Gisugdan sa kapulisan, Kagamhanan sa Siyudad sa Sugbo ug mga ahensya ang pagpatuman sa Oplan Disiplina apan ang mga nangasakpang nakalapas wa dakpa, gipahimangnoan ra.
Pasabot ni Police Lieutenant Colonel Wilbert Parilla, deputy city director for administration sa Cebu City Police Office (CCPO) nga ang gihimo lang una sa Oplan Disiplina teams mao ang pagbadlong ug pagpahimangno.
Daghan sila og nasita kay ninglapas sa mga ordinansa sa siyudad sama sa pagpanigarilyo sa publikong lugar, pataka og pagpangluwa, naghukas sa ilang senina ug nakalapas sa balaod sa trapiko.
Sa sunod nila nga pagsuroy sa kabarangayan dinhi na magsugod sila sa pagpanakop ug isyuhan og citation ticket ang makalapas aron makamulta sa salaod.
“Wala lang sa ta manakop kay nag warning lang ta sa mga tawo nga nakalapas sa mga ordinansa. Sa sunod dakop na gyud,” matod ni Parilla.
Hangtod sa gabii, dunay mga personnel sa Prevention, Restoration, Order, Beautification and Enhancement (Probe) team, Cebu Environmental Sanitation and Enforcement (CESET) team, Bureau of Fire Protection (BFP), Cebu City Transportation Office (CCTO) ug kapulisan nga mosuroy sa sudlonong bahin sa kabarangayan.
Apan kadtong maabtan nga sakyanan gi-overnight parking i-clamp sanglit padayon kini nila nga gipatuman bisan wala pa namugna ang Oplan Disiplina.