Patay diha-diha ang usa ka 46 anyos nga lalaki sa hantakan samtang nagduwa mga alas 8:50 sa gabii sa Biyernes, Septiyembre 30, sa Sityo Olibo, Barangay Buhisan, Siyudad sa Sugbo.
Ang gunman giingong kaduwa ra sab sa biktima.
Si Police Major Janelito Marquez, hepe sa Labangon Police Station, niila sa biktima nga si Aladdin Jabonero Junio, taga Sityo Kadasig Phase 4.
Sa imbestigasyon nga gihimo sa Labangon Police Station nasayran nga sa wa pa ang pagpusil, si Junio niantog sa hantakan samtang ang wa pa mailhing killer apil usab sa tapok sa namusta.
Samtang nagpadayon ang sugal, ang killer niibot og armas dayon nipusil sa biktima.
Si Junio naigo sa abaga ug nidagan aron motago apan pipila ka metros ang gilay-on gikan sa hantakan, nahagba.
Ang killer nigukod sa biktima ug gitiwasan siya sa pagpusil tumong sa ulo hinungdan sa iyang kamatayon. Ang Labangon Police Station nipanubay pa sa posibleng motibo.
Matod ni Marquez nga hayan nasuko ang killer kay napildi sa hantak dihang wala matarong pag-antog ni Junio ang sinsilyo.
Samtang usa ka kabhang ug usa ka wala kabuto nga bala sa wala pa nasuta nga kalibre sa armas ang narekober sa crime scene.