Usa ang patay ug tulo ang nangaangol sa duha ka managlahing mga aksidente sa habagatang Sugbo nga naglambigit og mga motorsiklo sa managlahing mga oras.
Namatay diha-diha ang usa ka babaye nga angkas sa motorsiklo samtang naangol ang iyang kauban nga maoy drayber human sila nadasmag sa usa ka 14-wheeler truck mga alas 4:30 sa hapon sa Biyernes, Septiyembre 30, sa Brgy. Sangat, lungsod sa San Fernando.
Ang biktima nga namatay diha-diha human gikatahong nalatayan sa trak giilang si Charlyn Jabolin, 23, dalaga, taga Brgy. Casapa, Jiabong, Samar samtang naangol ug gikatahong luwas na sa tambalanan, giilang si Rodelyn Joy Jabonita, 25, dalaga, driver sa Suzuki nga motorsiklo, taga Bayawan, Negros Oriental.
Gitanggong si Francisco Panugaling Oca Jr., 41, ulitawo, driver sa dump truck, taga Lapasan, Cagayan de Oro City.
Ang trak gipanag-iya sa Vic Enterprises nga nakabase sa Brgy. Mabolo, dakbayan sa Sugbo.
Si Police Staff Sgt. Randy Jakosalem, sa San Fernando Police Station nga nahinabi sa Superbalita Cebu, nagkanayon nga ang mga biktima pulos mga empleyado sa ASA Lending Corporation nga nakabasi sa dakbayan Carcar.
Matud pa niini nga gikan sa dakbayan sa Carcar ang mga biktima sakay sa Smash nga motorsiklo paingon sa dakbayan sa Sugbo.
Nagsunod sila sa trak ug sa pag-abot sa lugar, ni-overtake ang motorsiklo apan naapeke, nabangga sa trak.
Sa pagkatumba sa motorsiklo, nalatayan si Jabolin nga nag-angkas hinungdan nga namatay diha-diha.
Si Oca pabilin pang gitanggong sa San Fernando Police Station samtang gipaabot pa ang mga kabanay sa duha ka mga biktima.
KONSEHAL NAIGO
Lalaki nga nipailang opisyal sa airport gidakop sa kapulisan sa lungsod sa Samboan, habagatang Sugbo human siya giingong nakadasmag og mga motorsiklo samtang nagmaneho sa iyang awto sa alas 11:13 sa gabii sa Biyernes sa national highway sa Brgy. Suba.
Gitanggong si Damie Rosales Aranas, Jr., 59, minyo, taga Brgy. Mambaling, dakbayan sa Sugbo, nipailang operations officer sa Mactan Cebu International Airport (MCIA).
Si Aranas nga gikataho nga hubog maoy nagmaniho sa iyang blue Toyota Corolla (UNZ 241).
Ang biktima nga naangol giilang si Leonardo Tolentin Belangdal, 57, minyo, barangay konsehal sa Dalahikan, Samboan. Naangol usab si Aldulfo Ontal Ferraren, 53, minyo, taga Poblacion, Ginatilan.
Ang duha ka mga biktima nagmaneho sa managlahing mga motorsiklo.
Si Police Staff Sgt. Serge Jeramis, sa Samboan Police Station nga nahinabi sa Superbalita Cebu nagkanayon nga si Aranas hubog nga nagmaniho sa iyang awto uban sa higala niini.
Matud ni Jeramis nga namista sa lungsud sa Samboan si Aranas sanglit duna siyay kaliwat.
Si Aranas niasoy nga padung sila sa lungsod sa Ginatilan kay dunay paliton.
Dunay mga saksi nga niingon nga kusog nga nakapadagan si Aranas sa awto nga nag-ikis-ikis ug pag-abot sa kurbada, nikawat sa pikas lane.
Naigo og una si Belangdal nga gikasugat ni Aranas.
Padayon nga nipadagan si Aranas apan dunay tawo nga nagmotorsiklo nga nigukod ug nipahibawo kaniya nga nakaigo siya og tawo.
Nipaliko si Aranas aron mobalik hinungdan nga naigo na sab si Ferrarin. Ang konsehal gidala sa Rural Health Unit (RHU) sa Samboan samtang si Ferrarin gidala sa tambalanan sa lungsod sa Malabuyoc.
Sa pagsuwat ning taho, ang mga pamilya sa mga biktima ug si Aranas nagsabot alang sa amicable settlement.