Good luck sa tanang sumasakay. Karon, Oktubre 3, 2022, ang unang adlaw sa pag-epekto sa bag-ong pletihan nga gitugot sa Department of Transportation (DOTr).
Hinumdomi ang pasidaan ni Land Transportation Franchising and Regulatory Board (LTFRB) 7 Director Eduardo Montealto Jr. nga ang mga sakyanan nga wala nabutang sa opisyal nga taripa sa pletihan nga dayag sa mga pasahero dili makahimo sa pagpangolekta sa umento sa pletihan.
Unang gipahibalo sa naasoy nga ahensiya sa mga operator sa public utility jeepney, tradisyonal o modernized, bus ug mga taxi sa pagkuha og taripa sa ilang buhatan.
Sa Oktubre 1 ug 2, 2022, ang LTFRB nagsugod sa pagpang-isyu sa mga taripa sa nakabayad na nga operators. Ang wala pa makakuha niini magpadayon sa ilang karaang pletihan.
Samtang, dili na kinahanglan i-calibrate ang metrohan sa taxi sanglit ang flagdown rate dugangan ra kini og P5 ug walay kausaban sa naandang sukod sa kilometrahi. Ang flagdown rate sa taxi mahimo nang P45.
Ang minimum nga pletihan sa traditional jeepneys mahimong P12 gikan sa P11; modern jeepneys, P14 gikan sa P13; city bus (ordinary), P13 gikan sa P11; city bus (airconditioned), P15 gikan sa P13; ug provincial bus (ordinary), P11 gikan sa P9.
Ang maong umento gipatuman tungod sa pagmahal sa mga produkto sa petrolyo nga epekto sa pag-ataki sa Russia sa iyang silingang nasod sa Ukraine sa Silangang Uropa niadtong Pebrero ning tuiga.
Apan medyo salikwaot ang tayming sa pagpatuman sa umento tungod sa miaging sunodsunod nga upat ka semana nga dunay rollback sa presyo, diin ang kataposan niepekto niadtong Septiyembre 27, 2002.
Sa sektor sa transportasyon, maayo na lang kini bisan og naulahi kaysa wala. Apan sa habig sa mga sumasakay, laing paet nga atubangon. Bisan sa sunodsunod nga rollback sa lana, apan ang presyo sa mga nag-unang palaliton wala mokunhod.
Pagpakabana, ayaw og pagtunol subay sa bag-ong pletihan kon way taripa ang imong gisakyan.