ANG kahimtang karon ni LTO-Central Visayas Director Emmanuel Victor Caindec susama sa usa ka hinog nga bunga sa manga nga daghan ang mobato aron mahagbong sa punoan. Nailhan nako si Director Caindec tungod sa mga balita nga iyang ipatuman ang sakto ug husto nga pamaagi sa opisina sa LTO sama sa bayad sa pagrehistro sa mga sakyanan ug pagpatuman sa balaod ug lagda sa trapiko.
Apan lagi nabatasan na man gud sa uban (dili man tingale tanan), nga dunay palusot sama sa pagkuha sa driver's license, pagbayad sa rehistro sa mga sakyanan aron makadaginot o di ba modako ang ginansya sa nagnegosyo. Dunay usa ka dealer sa mga sakyanan nga gipasakaan og sumbong ni Director Caindec tungod sa giingon nga dili mao ang mga resibo. Ang nahitabo siya na hinuon ang gikiha og pangurakot.
Sa pulong pa sa mga bata, gidabodabohan og kaso si Director Caindec apan naa pa gihapon sa LTO. Si kanhi Secretary Harry Roque giakusahan si Director Caindec nga kurakot apan way kaso nga gipasaka batok kaniya ni Roque. Dunay gipahigayon nga congressional hearing batok ni Caindec tungod sa reklamo apan way ebidensya nga nitumaw batok kaniya. Ang nahitabo ang negosyante gimultahan ni kanhi LTO Asec. Edgar Galvante.
Niadtong Agosto 22, 2022, ang konseho sa lungsod sa Panglao, Bohol mipasar og resolution nga naghangyo kang Presidente BBM nga dili itudlo og balik nga regional director si Caindec sa LTO dinhi sa Central Visayas tungod, matud pa, kay giabusahan ang pagpanghatag og medical certificate sa mga miaplay og student permit nga pirmado sa doctor nga dili rehistrado sa ilang lungsod.
Taym pa. Ang doctor basta lisensyado sa Professional Regulations Commission sama sa mga abogado nga dunay admisyon sa Supreme Court makapraktis man sa ilang profession bisan asa nga dapit ning atong nasud sa Pilipinas. Pasabot ba sa bise mayor ug lima ka konsehal sa Panglao nga mipirma sa resolution nga kon ang usa ka dokumento nga ginotaryohan sa Cebu dili magamit o respetohan diha sa Bohol kon gamiton sa usa ka transaction sama sa palit sa yuta ug uban pa?
Akong tan-aw dunay usa o pipila ka opisyales sa Panglao nga wa mahimuot sa mga lakang nga gihimo ni Director Caindec sa paghatag og sayon nga pamaagi sa mga batan-on nga gusto na makakat-on og maneho sa motorsiklo o di ba awto.
Di ni pagdayeg ni Director Caindec, apan ang iyang gihimo nga caravan sa pagkuha sa lisenya sa pagmaneho maayo kay nakatabang sa mga driver nga nagsige na og maneho og sakyanan apan wala diay lisensya unya na mahibaw-an kon madisgrasya.
Padayon Director Caindec sa imong husto nga binuhatan ug pamaagi kay wala man koy nakita nga hiwi o supak sa atong balaod ug regulasyon sa mga programa nga imong gibuhat sa pagpalambo sa LTO. Ang kadtong gusto og shortcut o molikay sa balayronon sa kagamhanan maoy numero uno nga mosupak. Ang nakapaet sa trabaho sa kagamhanan kay ang strikto nga mopatuman sa balaod ug lagda maoy ipagawas nga dautan.