GITIN-AW sa konsehal sa lungsod sa Compostela, Davao de Oro nga ang bag-ong funeral hearse dili gamiton sa paglubong sa patay kon di alang sa pagkuha og patay gikan sa laing lugar aron ipauli sa lungsod.
Kini ang gibutyag ni Konsehal Harry Cabiling dihang nahinabi sa Superbalita Davao. Gibutyag niini nga ang maong sakyanan gitagana alang ngadto sa mga katawhan sa lungsod nga manginahanglan og sakyanan nga kasakyan sa ilang minahal sa kinabuhi nga namatay sa laing dapit.
Apan tin-aw niya nga di kini maoy sakyan sa minatay nga ihatud paingon sa sementeryo panahon sa lubong.
Kahinumdoman nga sa milabay'ng semana, miabot sa munisipyo ang maong funeral hearse nga sumala pa ni Mayor Levi Ebdao gigahinan kini sa lokal nga panggamhanan og pundo aron makatabang sa katawhan panahon nga adunay mamatay ilabi na gayud kadtong walay igong kuwarta aron igasto og pribado nga funeral vehicle.
Nagpasalamat sab ang mayor nga taliwala sa nasinating pagkunhod sa panudlanan sa munisipyo, nakahimo pa gihapon sa pagpalit sa maong sakyanan.
Daghan ang nalipay nga ang uban nagtuo nga magamit kining kasakyan sa lubong paingon sa sementeryo apan sa pagtin-aw ni Cabiling mas nasabtan sa mga katawhan ang matuod nga gamit sa sakyanan.