DAKO ang kalipay sa mga officers, members ug mga residente sa Barangay Talomo, Davao City sa ilang bag-ong Lamayan ng Bayan multipurpose building ug gymnasium nga mahimuslan gayod sa mga lumolupyo.
Kini human nga na-turnover ang duha ka gambalay Lunes sa buntag, Oktubre 3, 2022, pinaagi sa buhatan ni First Congressional District Representative Paolo Duterte.
"Kami nga mga residente dako gayod ang pasalamat kay naa nay Lamayan ng Bayan, ang mga pobre kaayo nga dili puwede sa ilang balay ug dili sila ka afford sa mga funeral parlor nga didto hayaon, so diri nalang sa Lamayan, dako kaayo among pasalamat kang Congressman Pulong," saysay ni Gerlie Cusain, 52-anyos, residente sa maong barangay nga nahinabi sa Superbalita pinaagi sa Messenger Lunes
Usa kini ka inisyatibo ni Duterte nga gipaningkamutan nga mahuman aron mahimuslan sa mga residente sa Barangay Talomo Proper.
"Thank you, congressman Duterte. Thank you, Mr. Rodrigo Duterte II and the entire First Congressional District Office staff. Rest assured that all your support to the barangay will reach thousands of people," sulti ni Barangay Talomo Proper Kapitan Engineer Bendor Calamba.
Nakatakda sab nga daghan pang mga susama niini nga gambalay labi na ang Lamayan ng Bayan nga ipang-turnover sa mga barangay sa Davao City sa mosunod nga mga higayon.