Madayon ang kasaulogan sa Sinulog Festival karong 2023 sa South Road Properties (SRP) sama sa gilantaw ni Mayor Michael Rama nga magbutang og “tent city” sa maong lugar.
Atol sa iyang unang 100 ka mga adlaw nga report kagahapon, Oktubre 3, 2022, si Rama niingon nga magdala siya og lainlaing hotel brands sa SRP ug maghimo og temporary tent city alang sa kapistahan.
Matod ni Rama, sunodsunod nga mga tigom ang gihimo sa Sinulog Foundation Inc.
“Kana karong atoang one Cebu Island Sinulog 2023... world tent city. Pag-andam mo daan sa inyong tent kay naa’y contest,” asoy ni Rama.
Siya nidugang nga ang Kagamhanan sa Dakbayan makig-alayon sa Hotel, Resort, and Restaurant Association of Cebu Inc. alang sa planong tent city sa SRP.
Si Charles Kenneth Co, presidente sa Cebu Chamber of Commerce and Industry, niingon nga ilang suportahan ang mga kausaban nga giplano ni Rama.
Dugang pa ni Co nga daghang pagplano ug pagpangandam ang angay buhaton aron magmalampuson ang Sinulog 2023.
“SRP is Cebu’s biggest investment and I understand the mayor wants to spur development in SRP and bringing Sinulog there is one of the ways to accomplish that,” matod ni Co.
Samtang si Visayan Electric CEO ug President Raul Lucero nibutyag sa mga tigbalita bag-ohay lang nga gihangyo siya ni Rama sa pagtaud og linya sa kuryente sa dapit nga pahigayunan sa Sinulog.
Matod niya nga ilang gisuportahan ang tinguha sa mayor ug nipasalig nga andam ang Veco pagtaud og power source, sama sa ilang gibuhat sa Cebu City Sports Center.
Matod niya nga mobutang sila og pasilidad nga mahimo nang magamit sa Siyudad kon dunay dagkong mga kalihukan sama sa Sinulog.
Wa pa hinuon siya nasayod kon asa dapit sa SRP kini ibutang kay nagpadayon pa ang mga tigom alang sa pagpangandam sa kalihukan nga duha ka mga tuig nang wa napahigayon.(dugang taho ni REV)