Nagkasinabot na sila si Tyler Herro ug ang Miami Heat sa upat ka mga tuig nga contract extension nga nagbalor og $130 million, matod sa usa ka kasaligang tinubdan kinsa di gustong magpaila gumikan kay wala pa’y pinal nga pag-anunsyo niini.
Ang kasabutan gibahin sa $120 million nga suweldo ug $10 million nga insentibo alang sa National Basketball Association (NBA) Sixth Man of the Year.
Ning maong kalambuan, magpabiling solido ang kinauyokang puwersa sa Heat nga naglakip sab nila ni Jimmy Butler, Bam Adebayo, ug Kyle Lowry sulod sa taas nga panahon. / AP