Adunay kinabuhi na usab nga mausab ning pahibawo sa Philippine Charity Sweepstakes Office (PCSO) nga may 433 nga nidaog sa 6/55 Grand Lotto draw niadtong Oktubre 1, 2022 sa kombinasyon nga 09-45-36-27-18-54. Bahinon sa 433 ka mga mananaog ang kantidad nga P236,091,188.40 nga jackpot prize diin ilang mabulsa matag usa ang P545,254.24.

Unang higayon kini sa kasaysaysan sa PCSO nga mosobra sa 400 ang nakadaog sa usa lang ka kombinasyon. Hinuon niadtong Enero ning tuiga, adunay upat nga ningdaog sa 6/42 lotto draw diin ilang gibahin ang P42,945,708.20 samtang sa Mayo ning tuiga laing tulo ang ningdaog sa P43,912,343.80 sa samang 6/42 draw.

Sa 433 nga nidaog, daw sa nabahin ang mga ningdaog sa tibuok. Gani sa Sugbo, adunay 14 niini ang ningdaog apan mas daghan ang gikan sa Metro Manila nga adunay 151 ka mga mananaog ug gisundan sa 34 gikan sa Cavite.

Makasurprisa ang resulta kay kon basehan nato ang panultihon nga “one in a million” ra ang makadaog ning klase sa sugal, di moabot ingon ini ang gidaghanon sa mga nakadaog bisan ingnon nato nga suwerte sila. Talagsaon nga moabot niini nga gidaghanon ang modaog ug kon naa man gani, anaa ra sa duha o tulo ang mananaog.

Angay nga susihon sa Kongreso kini aron masuta unsay klarong sistema nga gitamdan niini ilabi na nga gitugot kini nga sugal sa atong gobyerno. Lantawon usab kon natural nga kombinasyon ning daghang midaog o ba kaha lucky pick (LP) ba kay system-generated kini nga numero kun LP busa nabalikbalik ni siya sa paghatag nga numero nga minilyon man unta ang kombinasyon.

Ang panugal daw sa nahimo na nga parte sa lingaw sa mga Filipino ug kon sakyan sa swerte, mausab ang dagan sa kinabuhi, kana kon maayo pagkadumala ang salapi nga gikan sa daog sama sa lotto. Busa angay lang nga ang sistema wa molambigit og binuang ug matuohan ang resulta niini kay ang uban ra ba nga gisugal gihaguan kay lagi namasin nga makadaog.

Kadtong dugay nang nalambigit niini maningkamot nga makakuha og maayong kombinasyon sa numero sama birthday sa mga sakop sa pamilya o iyaha mismo. Unya usahay pangutan-on ang anak og unsay numero niini. Ang uban gani adto nila kuhaon ang mga numero nga naa sa lungon sa mga namatay nilang kabanay. (josephelvirtubilan@gmail.com)