Giproklamar sa Commission on Elections (Comelec) Special Provincial Board of Canvassers niadtong Lunes, Oktubre 3, 2022, si kanhi gobernador Roel Degamo isip tinuod nga mananaog sa Mayo 2022 nga gubernatorial race sa probinsiya.
Si Degamo, sa usa ka Facebook post human sa iyang proklamasyon sa Lunes, nagpasalamat sa iyang mga tigpaluyo sa ilang mga pag-ampo ug nisaad nga magpadayon sa pag-alagad sa iyang mga konstituwente.
“Sa katapusan, nahatag na ang hustisya. Daghang salamat sa tanang pag ampo ug pangaliya sa taga Negros Oriental. Ako magpabilin nga inyong tinuod nga gipili isip gobernador sa lalawigan sa Negros Oriental,” matod niya.
Ang pagbalik ni Degamo sa katungdanan nahitabo human giresolba sa Comelec ang petisyon nga gisang-at batok sa usa ka nuisance candidate ug gipawalay bili ang kadaugan ni Negros Oriental Governor Pryde Henry Teves.
Atol sa flag raising ceremony sa Kapitolyo sa Lunes, Oktubre 3, si Teves sa iyang pakigpulong niingon nga “honestly and gladly accept without any form of resistance” bisan unsa pa ang desisyon sa Comelec.
“Whatever happens, I hope the less than 100 days that I am with you, I hope I have shared some things that will help you in your career and personal lives in the future. One thing I can say, whatever happens, I am and will always be honored to work with all of you,” matod ni Teves.
Ang nuisance candidate nga ginganlag Grego Gaudia nigamit sa ngalan nga “Ruel Degamo” sa mga balota alang sa Mayo 9, 2022 nga eleksyon.
Si Gaudia gideklarar nga usa ka nuisance candidate kaniadtong Disyembre 2021 apan ang iyang abogado nisang-at og petisyon, nga naghimo sa iyang ngalan sa mga balota kaniadtong Mayo 2022.
Si Gaudia isip Ruel Degamo nakakuha og 49,039 ka botos sa Mayo nga eleksyon, apan ang Comelec en banc mi-affirm sa Disyembre 2021 nga resolusyon sa Second Division niini nga nagdeklarar kaniya nga nuisance candidate.
Kini maoy nakaaghat kang Roel Degamo sa pagsang-at og petisyon aron ibalhin ang mga boto ngadto kaniya, diin sa katapusan gitugot sa Comelec.
Ang pagbalhin sa mga boto nga nakuha sa nuisance candidate nipataas sa kinatibuk-ang gidaghanon sa mga boto ni Roel Degamo gikan sa 277,462 ngadto sa 326,501.
Nalabwan niini ang kinatibuk-ang botos ni Teves nga 296,897 pinaagi sa 29,604 ka botos human sa bag-ong hukom sa Comelec.
Apan base sa updated canvass sa Special Provincial Board of Canvassers, nakakuha si Degamo og 331,726 ka botos, samtang si Teves nakakuha og 301,319 ka boto.