Bag-ong hepe sa kapulisan sa dakbayan sa Sugbo hingpit na nga nilingkod human hulipi si Police Colonel Ernesto Salvador Tagle sa katungdanan.

Ang nihulip kaniya mao ang hepe sa Criminal Investigation and Detection Group Regional Field Unit 7 nga si Police Colonel Ireneo Dalogdog.

Gipahigayon kagahapon sa buntag, Oktubre 3, 2022 ang turn-over of command sa conference room sa Police Regional Office 7 nga gipangulohan ni Police Brigadier General Roque Eduardo Vega.

Si Tagle kasamtangan nga gidestino sa buhatan sa PRO7 director ug nagpaabot sa posisyon nga alang kaniya.

Gipasalamatan ni Tagle ang mga personnel sa CCPO nga iyang nakauban sulod siyam ka mga buwan nga iyang gihulagway nga malampuson ilabi na sa pagpatuman sa seguridad sa national ug local elections niadtong Mayo 9, 2022.

Iya kining gihulagway nga labing malinawon sa kasaysayan.

Ang pagpahugot sa kampanya batok sa illegal nga drugs, illegal nga sugal ug paghipos sa mga loose firearms ang usa sa gipasigarbo ni Tagle atol sa iyang paglingkod isip pangulo sa kapulisan sa dakbayan sa Sugbo.

Sa data nga iyang gibutyag, moabot sa P255,194,140 ang balor sa illegal sa ilegal nga drugas nga ilang nasakmit gikan sa Enero 2022 hangtod sa Septiyembre 30, 2022.

“During my stint as city director of Cebu City Police Office, we were able to intensify police operations against illegal drugs illegal gambling and the arrest of most wanted persons,” matod ni Tagle.

Gihangop usab ni Dalogdog ang iyang pagkatudlo isip hepe sa kapulisan sa dakbayan sa Sugbo sanglit daghan usab ang nagtinguha sa maong posisyon.

Giangkon sa bag-ong CCPO director nga usa ka dakong hagit ang pagkatudlo kaniya sanglit ang siyudad sa Sugbo maoy sentro sa Central Visayas.