Ang Department of Health (DOH) sa Central Visayas niingon nga ang rehiyon adunay igong medical personnel bisan pa sa taho gikan sa DOH Central Office nga ang nasud kuwang og mga nurse ug ubang healthcare workers.
Si DOH Central Visayas Director Jaime Bernadas, sa Lunes, Oktubre 3, 2022, nipasalig nga ang Central Visayas walay kakuwang sa mga healthcare worker, ilabina sa mga pampublikong tambalanan.
Si Bernadas nitug-an sa SunStar Cebu nga ang kakuwang sa mga healthcare personnel nasinati kaniadto sa mga pribadong tambalanan atol sa pagdagsang sa mga kaso sa Covid-19.
Apan iyang giklaro nga dili tungod kay walay medical staff, partikular na ang mga nurse, kay anaa ra.
“There is no actual lack of availability. The private hospitals lack nurses come surges of patients during the pandemic. It is not that there is a lack of available nurses. It’s just that they don’t hire more,” matod ni Bernadas sa Cebuano.
Gipahayag ni Bernadas nga kadaghanan sa mga gradwado sa medisina mipili sa pag-aplay sa mga ospital nga gipanag-iya sa gobyerno alang sa mas maayo nga suweldo.
Niadtong Septiyembre 29, si DOH Officer-in-Charge Maria Rosario Vergeire niingon nga ang nasud nag-atubang karon sa kakuwang sa mga healthcare worker.
Matud ni Vergeire nga adunay kakuwang o gintang sa 106,000 ka mga nurse nga gikinahanglan sa pagdumala sa mga pasilidad sa panglawas sa tibuok nasud, sa publiko ug pribado, ug nitataw nga kini mahimong tungod sa padayon nga paglalin sa mga medikal nga propesyonal.
Ang opisyal sa DOH niingon usab nga ang kakuwang sa manpower anaa usab sa mga doktor, pharmacist, radiologic technologists, medical technicians, occupational therapist, midwives, physical therapist, ug dentista.
Dugang pa niya nga sa mga tambalanan sa DOH lamang, adunay panginahanglan sa 624 ka mga nurse, 1,332 ka midwife, ug 63 ka mga dentista, diin ang tanan mga plantilla government position.