Si Senate Minority Leader Aquilino “Koko” Pimentel III nagkanayon nga moduso siya og resolusyon nga magtinguha sa pagpahigayon og imbestigasyon sa mga kalihukan sa pasugal sa Philippine Charity Sweepstakes Office (PCSO) human sa pagdaog sa 433 ka bettors sa lotto sa usa ka draw.
Matod pa ni Pimentel nga kini aron maseguro ang kaligdong sa mga dula ug kalihukan sa PCSO ug aron mapanalipdan ang mga Pilipino nga mahiligon sa pagpusta sa lotto.
Niadtong Sabado, Oktubre 1, 2022, daghang ang nakadaog sa PCSO 6/55 Grand Lotto nga adunay jackpot prize nga P236,091,188.40. Labing una kining higayon nga niabot og sama niini nga gidaghanon ang ningdaog sa kasaysayan sa lotto sa Pilipinas. Si Pimentel niingon nga ang resulta “katingad-an ug dili kasagaran.”
Matod niya nga mangayo siya og opinyon sa mga statistician ug mathematician bahin sa resulta sa mga draw sa PCSO.
“I will file a resolution, because this is my concern, these lotto games are authorized by the Republic of the Philippines. Therefore, we need to maintain and protect the integrity of these gambling games that we have authorized,” matod niya.
“Tanungin natin ang PCSO kung mga lucky pick (LP) ba itong mga winners na ito, that means system-generated ‘yung number nung tumaya pero therefore, there is nothing random about their LP kasi ibig sabihin nun binigay nila sa 400 plus katao, umulit-ulit. Millions po ang combination diyan,” dugang ni Pimentel.
Sa sayo pa, ang general manager sa PCSO niingon nga walay iregularidad ug ang nahitabo natural nga panghitabo.
Ang nidaog nga kombinasyon mao ang 09-45-36-27-18-54, tanan divisible sa numero nuwebe. Matag usa sa ningdaog makabulsa og P545,254.24.
Gikataho nga 14 sa mga mananaug taga Sugbo, apan wa nay gihatag pang mga detalye ang PCSO tungod kay mao kini ang ilang naandang proseso.
Tumong sa PCSO nga mapanalipdan ang mga mananaug sa posibleng mga hulga tungod sa pagdaug og dakong kwarta sa ilang pagpusta. (TPM sa SunStar Philippines)