Moabot ngadto sa 18 ka mga kilo sa gituohang shabu nga mobalor og P122.4 million ang nasakmit sa mga sakop sa Special Operations Unit (SOU) sa PNP Drug Enforcement Group Regional Field Unit 7 atol sa ilang gilusad nga buy-bust sa Lunes sa alas 12:00 sa udto, Oktubre 3, 2022, sa Holy Family Road, Barangay Busay, Siyudad sa Sugbo.
Unang nakuha sa mga operatiba ang duha ka mga kilo sa ginadiling drugas nga pasiunang gi-transact sa kapulisan.
Apan sa dihang nabantayan nga pulis ang nahatagan niini, kalit lang nisakay og habalhabal ang drug dealer ug nipaingon sa ubos nga habig na sa Barangay Lahug.
Gibilin ang gisakyan niini nga color maroon nga Toyota Innova nga way plate number.
Sa dihang gisusi ang sakyanan nga abli na ang bintana, nakita ang usa ka sako sa bugas nga adunay sulod nga 16 ka dagkong putos sa gituohang shabu.
Ang gituohan nga shabu motimbang og 16 ka mga kilo. Sa ilang pagsusi, nakompimar kini.
Matod sa opisyal sa SOU, kinsa wala nipaila, nga usa ka big time drug lord nga naa sa sulod sa bilanggoan ang tag-iya sa shabu.
Ang drug lord giingong sakop sa dakong sindikato sa illegal nga drugas nga nagpadagan sa Central Visayas.
Bisan nabilanggo na kini ug nag-atubang og daghang mga kaso nunot sa pagpamaligya sa ilegal nga drugas, padayon gihapon ang negosyo niini sa gawas pinaagi sa iyang mga gaway.
Wala lang una nganli sa police official kon kinsa lakip na ang ang tag-iya sa sakyanan nga gigamit sa nagbaligya og drugas tungod sa padayon nila nga followup operation.
“Nagtuo mi nga naa pa siya’y lain nga kauban, katong driver. Pagkahibawo niya nga police, kalit lang siya nisakay sa motor palayo. Wala na nato maabti pa,” matod sa police official.
Giingong gikan sa kaulohan ang supply sa ilegal nga drugas sanglit mabantayan ang pamaagi sa pagputos.
Ila pang subayon usab kon unsa nga grupo sa drug players sa Luzon ang nalambigit.
Dugay na nga gi-monitor sa kapulisan ang ilang target apan karon lang sila nakahigayon sa pag-transact.
Sa miaging adlaw, ang Parian Police Station sa Cebu City Police Office nakakuha og duha ka mga kilo sa gituohang shabu gikan sa usa ka gikatahapang durugista sa usa ka buy-bust sa Brgy. Lorega San Miguel nga mobalor og kapin P13 million.
Ilang sutaon kon usa ra ba ang supplier sa nadakpan sa kapulisan sa siyudad sa Sugbo ug ang nasakmitan sa mga sakop sa SOU.
Sa pagsuwat ning taho, wa pa nasuta kon nasubay na ba kinsa ang nakaeskapo. (BBT)