Dili pa makapaningil sa bag-ong umento sa pletihan ang mga public utility vehicles (PUV) nga wala pa nakalukat og taripa (fare matrix) gikan sa Land Transportation Franchising and Regulatory Board (LTFRB) sa Central Visayas.
Kini ang gipadayag ni Regional Director Eduardo Montealto Jr. sa LTFRB-7 human nisugod na og epekto ang bag-ong pletihan kagahapon, Oktubre 3.
Si Montealto nagkanayon nga adunay 12,000 ka mga unit sa PUV nga gilangkuban sa traditional public utility jeepney (TPUJ), modernized PUJ, taxi, transportation network vehicle service (TNVS) ug public utility bus (PUB) sa region-7.
Apan base sa record sa buhatan ni Montealto, wala pa molapas sa 1,000 ka mga unit ang nakakuha og fare matrix nga maoy ilang ibutang sa plastada nga bahin sa ilang mga unit aron sila makakobra sa bag-ong pletihan.
Si Julieto Flores, presidente sa Cebu Provincial Bus and Minibus Operators Cooperative (CPBMOC), nagkanayon nga wala pa sila nagkolekta sa bag-ong pletihan ug magtagbo pa silang mga opisyal aron ilang sabutan ang adlaw sa ilang implementasyon.
Ang bag-ong minimum nga pletihan sa unang upat ka kilometro sa TPUJ anaa na sa P12 gikan sa P11 ug P14 gikan sa P13 para sa modern TPUJ samtang P45 ang flag down sa taxi gikan sa kanhi P40.
Ang ikalima nga kilometro pataas sa TPUJ nagkantidad og P1.80 samtang P2.20 para sa modern PUJ ug P13 sa unang upat ka kilometro sa mga bus nga dili airconditioned ug P2.25 sa matag sunod nga kilometro ug P15 nga minimum alang sa aircon bus ug P2.65 sa matag sunod nga kilometro.