Gipusasan ang usa ka kapitan sa tugboat nga nakaangkorahe sa dakbayan sa Danao human sa entrapment operation kay giingong nidala og “menor de edad” sulod sa usa ka motel ala 1:30 sa kaadlawon sa Dominggo, Oktubre 2, 2022, sa may Mantawi Drive, Brgy. Subangdaku, dakbayan sa Mandaue.
Apan ang suspek nangatarungan nga ilang sinabutan ang hitabo kay nibayad siya og kuwarta ug nga siya giingong gipatuo nga 19 anyos na ang babaye.
Si Macarlito Miro Culanag, 54, biyudo, taga Brgy. Canlumacao, lungsod sa Santander, gitanggong sa Police Station 2 sa Mandaue City Police Office (MCPO).
Si Major Romeo Caacoy, Jr., hepe sa police station, kinsa nahinabi sa Superbalita Cebu, nagkanayon nga si Taña (dili tinuod niyang ngalan), uban sa iyang guardian, nidangop sa Police Station 2 niadtong Biyernes, Septiyembre 30, 2022, aron ireklamo ang suspek.
Si Taña nitug-an nga iyang nakaila si Culanag niadtong Septiyembre 9, 2022 ug nag-inom sila sa usa ka imnanan sa Mantawi Drive. Dihang nahubog na siya, giingong gidala siya sa suspek sa usa ka motel duol sa ilang giimnan. Ang dalaga nipasangil nga siya gihilabtan sa suspek ug giingong ni-video pa kaniya.
Niadtong Septiyembre 28, 2022, nahibaw-an sa biktima nga gi-share sa suspek ang video.
Giingong makita sa video nga naghubo tibuok lawas si Taña nga giingong gipahimuslan sa suspek.
Sumala ni Caacoy, nga niadtong Oktubre 1, 2022, ni-chat si Culanag sa dalaga nga mo-check-in sila sa usa motel sa Mantawi Drive. Ning higayuna, gihan-ay sa kapulisan ang entrapment operation. “Naa’y sex video gipakatap ang suspek unya makita sa video nga ang biktima nitulod sa suspek pero hubog na lagi, wala na kalugnot nakuha gyud iyang pagka-babaye,” dugang ni Caacoy.
SINABUTAN?
Si Culanag, nga nahinabi sa Superbalita Cebu, nagkanayon nga wala niya lugosa ang biktima. Matod niya nga iyang gisabot ang dalaga nga iya kining bayran og P2,500 aron makighilawas kaniya. Usa ka bayot nga giingong bugaw maoy nigiya kaniya pinaagi sa FB aron makighilawas sa biktima. Giingong nangayo og P3,000 ang bugaw.
Dihang nakontak niya ang biktima sa Messenger, nagkita sila, nagtagay sila og ilimnon hangtod nga niabot sila sa lawasnong kalipay.
“Wala man ko makahibalo nga minor siya (biktima) kay ang bayot niingon man nga 19 anyos. Wala ko nang-rape, sinabutan namo, P2500 bayad,” sumala sa suspek.
Matod ni Caacoy, nga giandam na sa ilang Women and Children Protection Desk (WCPD) ang kasong kalapasan sa RA 7610, Republic Act 8353 kun Anti-Rape Law of 1997 in relation sa RA 7610 kun Special Protection of Children Against Abuse, Exploitation and Discrimination Act ingon man kalapasan sa RA10175 kun Cybercrime Prevention Act of 2012.