“Mekad asabi mu king sarili mu,
‘Ing upaya ku at sikanan ding gamat ku
Mekagawang pibandyan para kanaku.’
Dapot ganakan me ing Ginung kekang Dyos,
uling Ya ing mamye king kegiwan
mung makapalto pibandyan.”
~Pamiyulit king Batas │Dangka 8:17
Deutoronomy 8:17)
“Ngeni king ninu man a gagawa, ing bayad kaya
E la mabibilang anting lamak dapot kayang katuliran.
At king ninu man a e gagawa dapot manwala Kaya
a pagmatulid na ing e maka-Dyos, ing kasalpantayanan na
mabibilang anting katuliran.”
~Ding Romanu │Dangka 6: Sunis 2
(Romans 4:2)
“Karing karelang pusu ding tau babalakan da ing gawan da,
dapot ing Ginu ing mitutuntun karing takbang na.”
~Diparan │Dangka 16: Sunis 9
(Proverbs 16:9)
“Uling darandaman tamung ding mapilan kekayu
mikakabye lang alang tatalukyan,
Alang gagawan nanu man,
dapot magkumwari lang asna kayabala.
Ngeni karing taung deti yutus mi
at pakisabi ming mayap king Ginung YesuKristu
Ing gawa king taimik a paralan
at kanan da ing sarili dang tinape.”
~Kadwang Aklat ning Tesalonika │Dangka 3: Sunis 11-12
(2 Thessalonians 3:11-12)
“Dapot nung ninu man ing e magadya para king sarili na,
At lakwas na para king kayang pibale-bale,
piglingad na na ing ing kasalpantayanan na,
At lakwas ya pang marok kesa king e sasalpantaya.”
~Mumunang Aklat nang Timoteu │Dangka 5: Sunis 8
(1 Timothy 5:8)
“Kamatutwanan i Allah e na palitan ing kabilyan ding memalen
anggang e da alilan nung nanu ing king lub da.”
~Koran │Dangka 12: Sunis 11
(Quran’s Ar-Ra’d 13:11)
***
Ing pamagat ning Kapisik ngening Duminggu, agya man asne kasampat kabaldugan—e ya pala mayayakit king Banal a Kasulatan o Biblya. Malapit yang bagya kabaldugan ing metung a sunis king Koran a tawli karing sunis a megamit anting pawaga dapot e pa mu rin matamak o e ya pa mu rin lubus antita kabaldugan. Ila pin detang sunis bayu deni.
Mangabaldugan mu a nung ala tamung gagawan o e ta kikimut bang mikapamangan tamu, alimbawa, o e ta tatanam nanu man—ala tamung pupulan agyang makananu tamu kadalas mangadi o sisimba. Nung nanu ing tenam mu, ya mu naman ing pupulan mu. Nung atin kang inunyab, atin kang tinun.
Kaylangan tamung gawa bang numabang king saup ning Ginu agya mang nung buryan Na agyang e ta gugunyat o agyang para kaninu man e ta karapatdapat tanggap kalam Na—sopan Na katamu pa mu rin nung kaburyan Na.
Manawang ing lumapit tamu king Ginu—agyang makasiklod tamung lalakad papunta king dambana—at manyawad Kayang kalam dapot ala ta namang gagawan. Alimbawa, pasaup yang manikwang matas a grade ing talapagaral dapot e ne man manigaral ditak man keng tiru da kaya king pipagaralan ning talaturu na.
Ing tau magmunikala ya, ing Dyos magkalub ya.
Ing kabaldugan ning pamagat ning Kapisik ngeni ya pin ing sukat tamung gunyat bayu bang mikakarapatang kalunusan ning Ginu o tanggap king nanu mang anyaran tamu Kaya. Dapot e mangabaldugan itang e Na katamu dinan pamangan nung e ta gawan ita. Kamatutwanan ati Na ngan ing kaylangan tamu keti king labwad. Binye na na bayu ta’pa anyaran. Kaylangan tamung paulagan at iyasik bang atin tamung pupulan.
E ta ya apusan ing alamat a i Juan Tamad a manayang ating byabas a manabu namu king asbuk na kabang kera-kera ya mu. Agtalan ta ya ing byabas bang apangan ta’ya at kumabsi tamu. Ditak mung kimut. Ditak mung pagal.
Anti karing ayup o aliwang lelangan a e na man tatanam dapot atin la pa mu ring kakanan parati pauli ning lugud ning Ginu kekatamu ngan, nung buryan Na, malyari tamu namang antita. Ita mu nung buryan Na.
Makanyan man, ing mayap anyaran tamu Kaya ya pin ing mipalapit tamu Kaya at asuywan ta’Yang tapatan at dalise. Ba’ta Yang alapitan, kaylangan ta Yang lapitan ing Dalise nang Talasuyu o Pure Servant/Devotee bang yang mituru kekatamu king pamaglapit king Ginu. Ita ing buri Na. Ita ing mumuna. At sukat tamung ipangadi at anyaran Kaya ing akilala at akit ta’ya ing Kayang Dalise Talasuyu.
***
Dake Talabaldugan:
1.milulutu (pangdiwa) saryang maglutu, ninu mang maglutng nanu man. English – someone who is cooking something. Alimbawa king pamangamit: “Milulutu ne ya namang pamangan nang Abling i ima na bang atin ya kanung bakalan potang galingaldo dumulung ya keng asikan.”
2.miluluyun (pangdiwa) mililibut, mililimbun, makapunta karing miyayaliwang dane, mipapasyal, makadalo. English – gets to wander, meander, amble, stroll, saunter, dawdle, putter, roam, rove, drift, coast, gallivant. Alimbawa king pamangamit: “Sadya bawal yang munta nu man karin i Idung—ngeni miluluyun ne kareng mangalaut a balayan.”
3.milub (pangdiwa) makalub, malyaring milub o lungub; mipagyu, misulud, misalaksak, makasalaksak. English – able to enter, or go inside, invade, infiltrate, penetrate. Alimbawa king pamangamit: “Milub ya ing damulag keng busbus ning singsing dapot e ya malyaring lungub ing paratut a tau king kayaryan ning banwa.”
***
MIKASING-KABALDUGANG at MISALUNGAT
KABALDUGANG AMANU TAMU
1.putat – mura o anak pa mung bulung ding mangga, balubad, sirgwelas, makopa, at aliwa pa.
2.langguk – mura o anak pa mung bulung ding kamanyang, kulubasa, patola o aliwa pang tanamang kukulate at gagapang.
3.talbus – mura o anak pa mung bulung ding kamuti, kamuting dutung, gandus (gagawan laing) o aliwa pang pamaangan a makakutkut bunga king gabun.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.