Bisan adunay angol, nitambong gihapon si Meralco Bolts forward Chris Newsome sa senemana nga praktis sa Gilas Pilpinas niadtong Lunes sa gabii, Oktubre 3, 2022, sa Meralco Gym.
Hinuon wala ra moapil si Newsome sa pisikal nga ensayo sa Gilas ug igo lang kining nag-obserbar kauban si Brgy. Ginebra Gin Kings import Justine Brownlee, kinsa kandidato aron himuong naturalized player.
Ang laing 14 ka mga magduduwa nga ningtunga mao ang nag-ensayo ubos sa paggiya ni national coach Chot Reyes.
“We have specific things that we want to achieve. So today, we wanted to achieve a couple of things done and they went hard right away. These guys are in shape, but more importantly get the opportunity of playing together,” batbat ni Reyes nga napatik sa www.gmanews.tv.
Ang mga ning-apil sa praktis mao sila si Scottie Thompson, Japeth Aguilar, Jamie Malonzo, June Mar Fajardo, CJ Perez, Roger Pogoy, Poy Erram, Calvin Oftana, Arvin Tolentino, Kevin Quiambao, Angelo Kouame, LeBron Lopez, ug William Navarro.
Ang Gilas Pilipinas nangandam alang sa 5th window sa FIBA World Cup Asian qualifiers diin asdangon nila ang Jordan ug Saudi Arabia sa sunod buwan.