MOHATAG ang Davao City og kinatibuk-ang P6 milyones nga pinansiyal nga tabang ngadto sa 13 ka munisipyo, siyudad, ug probinsiya nga naigo sa bag-ohay lang nga kalamidad sa nasud.
"It is the policy of the City Government of Davao to adopt measures and adhere to the national principles and standards of humanitarian assistance in response to risk reduction and declares as its policy utilize its resources and put the same to proper use," pagtin-aw ni Myrna Dalodo-Ortiz, Committee for Finance, Ways and Means and Appropriations, atol sa ika-13th regular session sa ika-20th City Council sa Davao kagahapon, Martes, Oktubre 4, 2022.
Matud ni Dalodo-Ortiz nga usa ka porsiyon sa 30 porsiyento nga quick response fund (QRF) sa singko porsiyento nga Disaster Risk Reduction Management Fund sa Davao City alang sa calendar year 2022 nga dunay kinatibuk-ang P6 milyon ang ihatag ngadto sa Local Government Units (LGUs) nga gideklarang ubos sa State of Calamities.
Mga LGUs kinsa modawat sa tabang pinansiyal mao ang mosunod: probinsiya sa Abra makadawat og P1,000,000. Ang munisipalidad sa Bauko, Tadian, ug Besao sa Mt. Province makadawat og P300,000 tungod sa Magnitude 7 nga linog niadtong Hulyo 27, 2022.
Ang munisipyo sa Tampakan, South Cotabato makadawat og P300,000 tungod sa pagdahili sa yuta ug pagbaha tungod sa kusog nga pag-ulan.
Samtang ang mag probinsiya sa Quezon ug Nueva Ecija pulos makadawat og P1,000,000. Samtang ang mga munisipyo sa Macabebe Pampanga, San Miguel Bulacan, Patnanungan Quezon, Candaba Pampanga, Dingalan Aurora, ug Cabangan Zambales makadawat og P300,000 matag usa.
Apan gitin-aw ni Dalodo-Ortiz nga bisan pa sa ipagawas nga tabang pinansiyal, ang Davao City duna pay P179 milyon alang sa sunod nga tulo ka bulan.