MALIPAYON ang 32 ka mga centenarians diin ang labing edaran kanila mao ang 114-anyos atol sa paghatag og pahalipay kanila sa City Government of Davao niadtong Oktubre 3, 2022 didto sa Grand Menseng Hotel, Magallanes, Davao City.
Ang programa pinaagi sa City Social Welfare and Development Office (CSWDO) ning siyudad sa Davao nga mag-ila ug modalit og pahalipay nga salapi kantidad P100,000 ug plaque kada usa.
Kadaghanan sa mga awardees personal nga mitambong sa programa, samtang ang uban, gisalmutan sa ilang mga miyembro sa pamilya.
Kuwalipikado alang sa award ang mga nag-edad og 100 ka tuig pagkahuman sa Disyembre 2, 2021, ang adlaw nga gipasa ang Ordinance Honoring Centenarians ning siyudad.
Gawas sa cash assistance, ang mga centenarians nga gikan sa lagyong mga lugar sama sa Marilog District gihatagan og hotel room accommodation sa buntag sa wala pa ang kalihokan.
Kadtong na-validate human sa awarding mahimo gihapon nga mo-claim sa mga insentibo. Kinahanglan lang nila nga mahuman ang application form gikan sa CSWDO-District Office ug magpakita og birth certificate o passport diin giila usab ang primary and secondary nga mga IDs.
Ang dugang nga mga detalye alang sa mga ID nga kinahanglan ipresentar nga makita sa Executive Order No 20, Series of 2022 nga ma-access pinaagi sa internet sa www.davaocity.gov.ph. (Uban sa taho sa PR)