Centcom miuli sa yuta sa Kapitolyo; kinsay mapagan?

File photo
File photo

Dul-an sa 5,000 ka mga bubong nga nahimutang sa 10 ka sityo sa Barangay Apas, dakbayan sa Sugbo ang hayan mawad-an sa ilang pinuy-anan.

Kini human nga pormal nang gi-turnover sa Department of National Defense (DND) ug Central Command of the Armed Forces of the Philippines (AFP-Centcom) ang mga titulo sa 17.5 ka hektaryang luna sa Barangay Apas ngadto sa Kapitolyo.

Gibutyag ni Apas barangay kapitan Virgil Cabigon sa SunStar Cebu nga gawas sa maong 5,000 ka bubong, mapagan sab ang barangay hall ug tulo ka mga publikong tunghaan.

Ang mga sityo nga apektado naglakip sa: Central Apas, Sto. Niño, Mahayahay, Plaza, Fatima, Upper ug Lower Panabang; Upper ug Lower Calvary ingon man ang Rotunda.

Nahulga ang barangay hall ug ang mga tunghaan sa Apas National High School, Apas Elementary School ug Camp Lapu-Lapu Elementary School.

Nasayran nga ang maong luna maoy giukopahan sa militar sukad sa 1959 nga unang gi-donate sa Kapitolyo ang 80 ka hektaryang luna ubos sa usa ka kondisyon nga gamiton kini alang lang sa militar.

Human sa dul-an 40 ka tuig, gibasura sa mga opisyal sa Probinsya ang kasabutan sa dihang nasuta nga 14 ka mga parcel sa luna lang ang gigamit niini alang sa military operations.

Samtang ang uban gihimong residential sites alang sa military personnel ug informal settlers, lakip na ang lapad nga golf driving range.

“This issue has spanned decades and the administration of four presidents - from Pres. Gloria Macapagal-Arroyo when we first signed the memorandum of understanding, to Pres. Nonoy Aquino, and then to Pres. Rodrigo Duterte,” asoy ni Cebu Governor Gwendolyn Garcia.

Atol sa unang termino ni Garcia niadtong 2005, niduso og ejectment case ang Kapitolyo batok sa CentCom aron mabawi ang property.

Subay sa kasabutan, gilauman nga iuli sa CentCom ang luna sa Kapitolyo samtang mogahin og pundo ang kagamhanan sa probinsya alang sa pagpanday sa gikinahanglang mga pasilidad alang sa militar ingon man sa DND.

Apan wala mouyon ang CentCom hinungdan nga gisang-at nila ang kaso sa korte nga natapos lang sa 2019.

Samtang si DND officer-in-charge, Sec. Jose Faustino Jr. sa iyang bahin, niabi-abi sa nahisgutang kalamboan sanglit mogahin og financial support ang Kapitolyo alang sa pagtukod sa mga pasilidad nga gikinahanglan alang sa pagbalhin.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph