Mokabat ngadto sa 40 ka teams nga gibahin ngadto sa lima ka mga kategoriya ang gipaabot nga magtigi sa pagbalik sa Minglanilla G-Sports Basketball League (MGBL) nga sugdan karong Dominggo, Oktubre 9, 2022 sa Minglanilla Sports Complex, Sugbo.
Ang mga kategoriya nga salmutan sa mga partisipante mao ang 13-under, 15-under, 18-under, 21-under ingon man girls 18-under.
"We started this with 14 teams in 2018 with two categories. Successful man ang Season 1 nato mao ni nga nidaghan ang niapil ron," matod ni Gerry Canonigo, kinsa maoy founder sa G-Sports Entertainment nga mao usab ang nag-ugmad sa MGBL.
Sagad sa mga ningkompirmar nga mosalmot sa kompetisyon nagrepresentar sa ballclubs ug training camps nga nagbase sa dakbayan sa Sugbo.
Si Mar Largo, ang usa sa pangabaga ni Canonigo, nibutyag nga adunay mga eskuwelahan nga ningsalmot usab ning kompetisyon.
Apan gumikan kay dili man tugtan sa mga unibersidad ang ilang mga regular players sa Cebu Schools Athletics Foundation Inc. (CESAFI), hayan ang sagad niini ang Team B maoy ipadala.
Ang torneyo molungtad og duha ka mga buwan.
Gipaneguro sa organizers nga ilang gihikyad ug giplantsa ang schedules sa duwa aron dili ma-conflict sa eskuwela sa mga magduduwa.
Ang top three sa 21-under ug 18-under makadawat og cash prizes ug tropeyo gikan sa Prosel Pharma, samtang sa ubang kategoriya ang mga mananaog aduna usab tropeyo ug mga ekipo sa sports.
Sa samang higayon, mapasalamaton si Canonigo sa Prosel Pharma nga maoy usa sa ilang official sponsor.
Gibutyag usab ni Canonigo nga human unya sa basketball, mopasiugda usab sila og laing sports events.
Iyang gitino nga tuyo nila mao ang pagdiskobre sa mga talento ug abilidad sa mga bata sa natad sa paugnat sa kusog ilabi na kadtong wala makasalmot sa CESAFI.
"Ang CESAFI man gud is naka-focus sa Cebu City and we have many potential players, specially from Cebu south and north, nga wa silay tournament nga apilan. So karon naa na ang G-Sports nga maoy one of the avenues to showcase their talent," matod ni Canonigo atol sa press conference niadtong Lunes nga gipahigayon sa Minglanilla Sports Complex.