DUMOT ang hinungdan sa panangsangka sa duha ka armadong grupo alas 4:15 sa hapon, Martes, Oktubre 4 sa Midsayap, Cotabato province.

Gibutyag ni Midsayap chief of police Lieutenant Colonel Rolly Oranza nga nagkaengkuwentro ang grupo ni Kumander Lak, kanhi sundalo ug sakop sa Moro National Liberation Front (MNLF), batok sa grupo ni kanhi Barangay Kapitan Renz Tukuran alyas Kumander Renz sa Moro Islamic Liberation Front (MILF) sa Barangay Sambulawan sa Midsayap.

Tungod niini, mga molupyong sibilyan nalisang sa mga buto-buto sa mga armas, hinungdan nga daling nanghikling paingon sa mga luwas nga dapit sa kahadlok nga maipit sa kagubot.

Wala madugay, nahidangat sab dayon ang nagresponde nga mga sundalo ug pulis nga maoy nagbantay sa mga bakwit nga pamilya.

Nasayran nga ang Barangay Sambulawan sa nahisgutang lungsod nahisakop na karon sa Special Georaphic Area (SGA) sa Bangsamoro Autonomous Region in Muslim Mindanao (Barmm).

Gipamahayag ni Municipal Social Welfare and Development Office (MSWDO) Officer Karl Ballentes nga nakig-alayon na sila ni Mayor Rolly Sacdalan sa SGA-Barmm alang sa dinaliang tabang ngadto sa mga pamilya nga mibakwit sa nahisgutang barangay.

Gihulat na lamang sa militar ug kapulisan ang "go signal" sa Government of the Republic of the Philippines ug Moro Islamic Liberation front (GRP-MILF) Peace Panel aron sudlon ang duha ka sityo sa Brgy. Sambulawan nga sentro sa pinusilay sa magkaaway nga grupo.

Nasayran nga bisan Miyerkules sa buntag mabati pa ang katag-katag nga mga buto-buto sa armas gikan sa nagkaaway nga grupo nila Kumander Lak ug Kumander Renz, kon diin duna nay gitaho nga napatay ug naangol apan gipailawom pa kini sa kompirmasyon.