DILI pasagdan na lang ug kinahanglan nga masilotan gayod sa balaod, labi na kon mapamatud-an sa mamahimong resulta sa imbestigasyon nga dunay kalapasan ang duha ka mga pulis nga sakop sa Davao City Police Office (DCPO).
Kini human nga gipangdakop sa General Santos City police ang duha ka pulis sakop sa DCPO nga anaa nadestino sa Bunawan Police Station ug sa Foot and Bike Patrol.
Sumala ni DCPO Spokesperson Police Major Catherine Dela Rey nga nagpadala na og mga investigators ang DCPO didto sa General Santos City aron nga mohimo og imbestigasyon may kalabutan sa robbery case nga gikalambigitan sa duha ka mga pulis.
Dugang ni Dela Rey nga naa'y mga laing impormasyon nga nadawat ang DCPO nga kinahanglan pa og validation apan bisan pa man niini, dili i-tolerate ni DCPO Director Police Colonel Alberto Lupaz ang sayop nga binuhatan sa duha niini ka mga sakop.
Tungod niini, girilibo sa puwesto ang ilang mga immediate supervisor ug commander tungod sa gitawag nga command responsibility.
Narekober ngadto sa posisyon sa duha ka mga pulis ang giingong mga gamit sa reklamante ug ang alegasyong kuwarta, lakip ang usa ka 5.56 Bushmaster rifle, duha ka .45 caliber pistol, duha ka 9 millimeter pistol, ug usa ka rifle grenade projectile.
Gilayon sab nga mipagula og pamahayag ang Police Regional Office (PRO-Davao Region) labot sa hitabo.
"Police Regional Office 11 would not tolerate any personnel engaging in any acts of lawlessness or crimes. Hence, everyone could expect a fair and honest investigation," tipik sa opisyal nga pamahayag sa PRO-Davao pinaagi sa spokesperson Police Major Eudisan Gultiano, Miyerkules sa buntag, Oktubre 5.