Ugas gitugtan na nga mobalik sa training

Gitugotan na sa mga doktor si kanhi world welterweight champion Cuban Yordenis Ugas nga makabalik sa training nga wala’y restriksyon.

Si Ugas taodtaod sab nga nagpaalim sa angol sa iyang mata (fractured oribital bone) nga iyang nasinati atol sa iyang 10th round TKO nga kapildihan sa ilang unification bout batok ni American Errol Spence Jr. niadtong Abril, 16, 2022.

“Thank God the doctor allowed me to train with full contact,” matod ni Ugas nga napatik sa www.boxingscene.com.

“But we are not going to fight yet. Let’s keep training. They have been difficult months. I was seeing double, with a lot of discomfort. It has been a war, but it is one more that I’ve been able to fight. Thank God we’re moving on.”

Sa inisyal nga plano ni Ugas, tinguha niyang moaway pagbalik sa unang tunga sa 2023.

Gitataw ni Ugas nga kinahanglang mahibalik una ang iyang saktong kondisyon una siya mobalik pagsaka sa ring.

Gusto ni Ugas nga mahimo siya pagbalik nga world champion sa sunod tuig.

Mas nailhan si Ugas sa kalibutan sa boksing human sa iyang surpresang unanimous decision nga kadaugan batok kang Filipino boxing legend Manny Pacquiao niadtong Agusto 21, 2021 sa ilang World Boxing Association (WBA) welterweight title bout.