Ning-atras sa ilang partisipasyon ang University of the Philippines (UP) Cebu Fighting Maroons sa umaabot nga basketball tournament high school ug college divisions sa Cebu Schools Athletic Foundation Inc. (CESAFI).
Mismong si Cesafi commissioner Felix Tiukinhoy Jr. ang nikompirmar niini sa Sun.Star Cebu.
Gipasabot ni Tiukinhoy nga nagkinahanglan pa ang Figthing Maroons og dugang panahon aron makaporma og puwersa nga makakombati og insakto sa labing dakong inter-school basketball competition sa Visayas ug Mindanao.
Usa ka opisyal sa UP Cebu ang nikompirmar sab niining maong kalambuan. Matud sa maong opisyal nga magpadala sila og pormal nga suwat ngadto sa Cesafi kabahin sa ilang desisyon.
Gipasabot ni UP Cebu basketball head coach Bong Abad nga sulod sa tulo ka mga semana pa lang niyang natapok ang ilang mga magduduwa hinungdan nga siya mismo ang nisugyot sa tunghaan nga dili pa andam ang ilang puwersa.
Nagkanayon si Abad nga kon pugson nila ang sitwasyon, makahatag kini og bati nga impresyon sa team.
Sa pag-atras sa Fighting Maroons, naahat ang Cesafi sa pag-usab sa ilang eskedyul. Sugdan ang basketball tournament karong Oktubre 16, 2022.
Niatras man tuod ang UP Cebu sa basketball apan mokombati kini sa ubang sporting events nga mao ang volleyball, chess, scrabble, table tennis, dancesport, swimming ug e-sports.