Daghang nakapangutana nganong mas bata gihapon tan-awon ug slim ang kasagarang mga Haponesang babaye ikumparar sa ubang kababayen-an sa kasilinganang nasod.

Kining mosunod ang ilang mga sekrito nganong dugay sila matiguwang lakip ilang panagway unya di sab sila mo dako o mo tambok pag-ayo.

Una ang pag-inom og green tea. Ang nasod nga Japan naila nga pinakadako mokunsumo og green tea sa tibuok kalibutan. Ang green tea makatabang pagpahiyos sa mga hubag-hubag. Gawas nga anti-oxidant kini, dali sab kini makapaayo sa samad, paundang sa pagdugo, makatabang sab kini og pahilis sa kinaon ug pag regulate sa temperatura sa lawas. Duna sab kini caffeine ug amino acid nga makapa-improve sa pangisip ug pangutok.

Sunod kining pagkaon og daghang seafood sama sa kinhason, nukos, isda, octopus, eel nga daghan og nutrients, protina, bitamina og minerals, Omega-3 fatty acids nga makapaubos sa risgo sa mga sakitsakit sa kasingkasing apil ataki, rheumatoid arthritis ug depresyon. Kini ang mga isda nga taas og Omega-3: Salmon, trout, sardinas ug tuna.

Ikatulo ang regular nga paglakaw-lakaw, ehersisyo og meditasyon. Maayo ni kay way gasto. Kon naa lang kay komportabli nga rubber shoes, good to go na ka. Hinayhinay lang usa sa sinugdanan hangtod nga maanad sa paglakaw unya kon mahimo kada adlaw. Ang paglakaw makatabang og paubos sa blood pressure, taas nga cholesterol, diabetes og sakit sakit sa kabukugan.

Sunod ang healthy nga pagluto sa pagkaon aron di mawala ang sustansiya ug bitamina sama sa pag-steam, bake, pabukal ug sugba sa pagkaon imbis i-prito nga puno sa mantika.

Healthy nga desserts. Kasagarang i-dessert mga cakes, ice cream o mga bake products. Sa Japan, pilion nila ang dessert nga presko ug way daghang kamay sama sa prutas.

Ubang tips apil ang paggamit og brown sugar imbis puti o refined sugar, whole wheat nga harina imbis refined, cocoa powder o cacao imbis stokolate, ug almond o coconut milk imbis full cream.