Kada bukas og karsada, naa kanunay sa huna-huna sa public officials mao ang mga sakyanan sama sa mga awto ug trak. Magsige og bukas og karsada kay nagtuo nga mao ni ang solusyon sa paghuot sa dagan sa trapiko. Apan bisan pag pila ka mga karsada ang buksan, moabot ang panahon nga maghuot ra gihapon ang dalan.
Sumala gud, dagko na man ang mga karsada gikan sa Ayala paingon sa Nasipit, Talamban apan pagligid sa katuigan, naghuot na man. Ang tulo ka mga flyover sa Archbishop Reyes Avenue gipaabot nga mosulbad sa trapiko, apan wa gihapon.
Sa gamay lang nga aksidente sa karsada, ang mga sakyanan mahunong o mag-aginod na. Bisan pag ang four-lane nga mga dan himuon pang six-lane, di gihapon ni paigo kay way pag-undang ang pagsaka sa gidaghanon sa mga sakyanan.
Mahunong lang ang pagpanaghan sa mga sakyanan kon duna nay maayong mass transport system ug luwas kini.
Ang mga nasod sa Europe misulbad sa suliran sa trapiko pinaagi sa pagdasig sa mga tawo nga magbiseklita. Wa sila nagbutang og bike lanes kay ang biseklita ila mang gihimo nga tipik sa matang sa transportasyon.
GIPALABI
Dinhi sa atoang nasod, hari ang mga sakyanan nga dunay makina. Duna gani magbiseklita, businahan ug usahay hulgaon pang dasmagan. Mao nang dunay bikers nga naglagot nang daan sa mga motorista, gamay lang nga bikil sa trapiko, modako dayon ang away. Mosangko sa road rage, sama adtong nangahitabo sa dakbayan sa Mandaue pipila ka mga buwan na ang nakalabay.
Sa ako nang gibalikbalik dinhi, kon himuon lang sa mga policy maker nga luwas ang mga karsada sa magbiseklita, maengganyo pa ang mga trabahante nga middle class nga dunay sakyanan sa pag biseklita na lang.
Labina karong panahuna nga ang presyo sa gasolina grabeng mahala. Kami lang, ang tubil namo sa motor kaniadto di moabot og P300, apan karon, dunay time P400 na kapin. Unsa na kaha ang four-wheeled nga mga sakyanan?
Kada tuig nagkadaghan ang mga sakyanan. Moabot na unya sa punto nga kanunay nang mapuno ang mga commercial parking area samtang di na makairog sa karsada.
EPEKTO
Ang pagdaghan sa mga sakyanan sa karsada nakadaut sa ekonomiya. Bilyunes ka pesos ang danyos aning trapiko kada tuig. Gawas nga nakadaut sa ekonomiya, hulga usab kini sa panglawas. Mas daghang sakyanan sa dan, mas taas ang pollution gikan sa mga aso nga gibuga.
Apan wa nakaamgo ang mga motorista niini, apil na ang mga opisyal sa kagamhanan. Pwerte ra bang hinaya nga nakapatuman sa mga proyekto sa mass transport. Mas hinay pa sa bao.
Gikinahanglan ang radical nga lakang aron makabadbad ang katawhan gikan sa nagtubo ug nagdakong suliran sa trapiko.
Gikinahanglan ang short term solution sa suliran samtang magpaabot pa sa medium ug long term nga sulbad. Kay kon di mapugngan ang pagdaghan sa pribadong mga sakyanan, mograbe pa og maayo ang suliran.