Nahasol kaayo ang mga opisyal sa Brgy. Santo Niño, dakbayan sa Sugbo sa usa ka babaye nga giingong magpatuo nga nadasmagan apan diay “drama ra.”
Matod ni Barangay Kapitan Lourdes Ramirez sa interbyu sa Superbalita Cebu nga usa sa ilang mga problema ang hamtong babaye nga ilang natino nga lumolupyo sa silingan nga barangay.
“Duna puy tiguwang dinha nga unsay kalaki ana niya, aron makakuwarta siya, kon dunay molabay nga sakyanan magpadasmagdasmag siya. Di mohunong ang sakyanan aron makig-settle,” matod ni Ramirez.
Aron di mahasol ang tag-iya sa sakyanan, mobayad na lang kini ngadto sa tiguwang babaye, kinsang ngan gipugngan ning mantalaan.
Matod niya nga anha kini magyampungad sa usa sa mga karsada sa ilang barangay.
Iya na kining gisuwayan og dala ngadto sa Brgy. Ermita diin kini nagpuyo, apan inig ka ugma mobalik na sab.
Dihay nahanaw ang maong tiguwang og mga duha ka adlaw, apan mibalik kini ug mao na sab ang modus.
Iyang giawhag ang mga tawo sa dapit nga pahibaw-on ang mga motorista nga “nag inartista” lang kini apan way nakaako sa pagsulti.
Nakahasol kini di lang sa mga motorista, kon di sa mga establisemento sa patigayon usab nga naa sa duol.
“Almost everyday ko nga gitawagan sa problema aning babayhana. Unsaon ko man na siya?,”dugang sa kapitan.
Matod ni Ramirez nga ang mao nga problema tipik lang sa ilang suliran sa street dwellers.
Nagsige tuod og operation ang Siyudad uban sa kapulisan aron mahipos ang mao nga mga tawo, apan kon way shelter nga kabutangan, mamalik ra sab kini sa ilang nahimutangan.
Matod sa kapitan nga mao kini ang iyang nakita nga medium term nga solution sa street dwellers nga alang niya maoy numero unong problema sa ilang barangay.
Dunay uban nga anha mangatulog atubangan sa mga buhatan nga nakahasol kaayo sa operasyon sa mga balay patigayon.
Maghilak ang adlaw nga way manawag nga balay patigayon tungod niini nga problema.