DI PA tugtan ang "overnight" nga pagbisita sa mga sementeryo sa taliabot nga kalag-kalag bisan pa kon ang siyudad gipailawom sa mas lugak na nga Alert Level 1, sumala sa Davao City Police Office (DCPO) niadtong Biyernes, Oktubre 7.
Atol sa paghinabi uban ang Davao City disaster Radio, si DCPO spokesperson Police Major Catherine Dela Rey nagsulti nga imentinar gihapon nila ang istriktong sumbanan alang sa tibuok kasaulogan sa kalag-kalag gikan sa Oktubre 30 hangtud sa Nobyembre 3.
Ang dakbayan sa Davao magdili sa pag-estar sulod sa sementeryo sa kagabhion kay mga sementeryo abli lang gikan alas 6:00 sa buntag hangtud sa alas 8:00 sa gabii.
Apan ang publiko makahimo pagbisita sa mga sementeryo tanan sa samang higayon di sama sa miaging kalag-kalag sa kasagsagan sa Covid-19 restrictions kon diin mga mobisita imonitor ug tugtan lang bagsa-bagsa.
"I-maintain gihapon nato ang minimum public health standards," matud ni Dela Rey.
Gawas sa security cluster, ang Davao City Covid-19 Task Force duna nay gisugdan nga inisyal nga plano bahin sa panglawas ug seguridad sa kalag-kalag nga maglakip sa pagmuntar og tulda o stations sa mga sementeryo aron sa pagmonitor sa mga tawo.
Kung usa ka indibiduwal magpakita og Covid-19 symptoms, matud ni Schlosser nga di nila kini tugtan nga makasulod sa tugkaran sa sementeryo.
Sa samang higayon, gitug-an ni Dela Rey nga mga gibana-bana nga 300 pulis o auxiliary personnel ipakatag sa kalag-kalag, nga langkuban sa 37 ka mga sementeryo sa Davao City.
Atol ning panahona, mga mahait nga butang, backpacks, ug ilimnon did-an nga makasulod sa sa mga sementeryo alang sa seguridad.
"Nagpaabot pa ta sa overall protocol to be released by the Public Safety and Security Command Center (PSSCC)," tug-an ni Dela Rey.