Pagpusil-patay sa kanhi barangay kapitan sa Gen. Climaco, dakbayan sa Toledo niadtong Dominggo sa alas 5:30 sa hapon, Oktubre 9, nisangko sa pinusilay tali sa usa sa mga kauban sa opisyal ug sa gunman.
Sa pasiunang taho sa Toledo City Police Station, ang biktima nga giilang si Antonio Yumol Canonego, nagsakay sa iyang motorsiklo kauban ang iyang higala ug bodyguard nga usa ka Bern Benlot sa may Brgy. Bagakay nga nagpista.
Kalit nga gipusil si Canonego sa riding in tandem nga nakaigo makaduha sa iyang likod.
Si Benlot, kinsa matud sa kapulisan armado og kalibre .45 nga pistola base sa sulti sa mga saksi, nakahimo sa pagbawos nga nakaigo sa paa sa gunman ug nisangko sa pinusilay.
Bisan samdan, daling nakasibat ang gunman angkas sa usa ka motorsiklo nga gimaneho sa gituohang kauban niini nga nagpaabot.
Si Canonego daling gidala sa Toledo City Medical Hospital apan patay na kining niabot.
Nakuha gikan sa crime scene sa tunga-tunga sa karsada ang 10 ka mga kabhang sa bala sa kalibre .45 nga pistola, usa ka magazine ug tulo ka mga bala sa samang armas.
Gitino pa sa kapulisan ang motibo. (GPL)