NAG-TRENDING karon sa social media ang post sa usa ka Franchesca Andrea Hidez nga nakasakay niya ang 79-anyos nga lola paingon sa Davao City gikan sa norte nga bahin sa rehiyon.
Sumala pa si Lola nga padung siya sa Libungan, Cotabato Province nga mibiyaheng nag-inusara gikan sa Tagum City.
Sakay sila sa usa ka van, gisaysay niini sa iya ang ilang pag-inistoryahanay sa lola ug nasayran nga gipalayas kuno siya sa iyang anak hinungdang miuli kini paingon sa iyang apo nga P100 lang ang dala nga kuwarta.
Sa kaluoy, gihatagan ni Hidez si lola og P300, gidugangan sa iyang amiga nga si Angie Bee Camarillo og P200 hinungdang miabot og P500 ang kuwarta ni lola.
Wa sab gidawat sa van drayber ang plite ni lola ug giingnan ni Hidez ang drayber nga ipahiluna si lola nga makasakay padung sa Libungan.
Sa post ni Hidez, tambag niini, "Kita nga mga anak dili nato sayon-sayunon atoang mga inahan sa pagpalayas kay wala mo kabalo sa ilang sakripisyo sa atoa sa bata pa ta. Sa mga anak ni nanay nga taga Pioneer daw ug Calachuchi Tagum City... unta maka-hunahuna mo sa inyong inahan nga giingong gipalayas."
Ang maong post mibaha og daghang komento, diin dunay mga nagpabati sa ilang kaguol, ug nakahilak.