Di na mapugngan pirmahan na unya ni Presidente Bongbong Marcos ang subscriber identity module (SIM) Registration Act nga gitinguhang makasulbad sa mga text scam ug ubang mga krimen nga migamit og mga cell phone. Mao unya kini ang unang balaod nga pirmahan ni Marcos sukad sa iyang paglingkod sa Malacanang.

Mosobra sa 120 milyones ka mga mobile customer dinhi sa atong nasud lakip na niini kadtong daghan og mga mobile phone numbers. Anaa sa 95 porsiyento kanila naggamit og prepaid nga SIM nga wa mohatag sa ilang mga personal nga impormasyon sa telecommunication companies, di sama sa postpaid accounts.

Kon mamahimo na kining balaod, way SIM card nga ibaligya ngadto sa usa ka tawo kon di siya morehistro ug mohatag sa iyang personal nga impormasyon. Ang tanang naggamit sa prepaid ug postpaid nga mga SIM gikinahanglan nga morehistro sud sa 180 ka adlaw kun mga unom ka buwan sukad sa paggamit kay kon mapakyas, di kini magamit.

Gikinahanglan ang balido nga identification card nga giisyu sa gobyerno diin may hulagway nga ipakita atol sa pagrehistro aron insakto ang impormasyon nga ihatag sa tawo nga nanag-iya sa SIM. Kadtong mapakyas o di moparehistro sa ilang SIM sa way igong rason, pamultahon kini sa kantidad P100,000 ngadto sa P1 milyon.

Wa na unyay mailad og linibo niadtong mga tawo nga gihimong gatasan ang ilang SIM aron sayon makapanguwarta niadtong dali ra usab kaayo madala sa ilang mga binuang. Mailhan na usab kinsa ang mangilad kay nakarehistro na man ang SIM ug sayon na siya pasakahan og kaso.

Ang bantayanan lang niini kon ang mga public telecommunication entity (PTE) diin anaa kanila ang impormasyon sa matag tawo nga anaay SIM, ilang ibutyag o sekreto nga ihatag ang naasoyng mga impormasyon. Hinuon kon masakpan ang kompaniya, ilang mga ahente o kaha empleyado nga misupak sa balaod, pamultahon silag P500,000 ngadto sa P4 milyones.

Bisan anaa ning balaura, di pa gihapon malikayan nga adunay mga tawo nga tun-an na usab kini nga paagi aron lang makapangilad ug makapanguwarta niadtong mga tawo nga sayon ra usab kaayo nga mailad. (josephelvirtubilan@gmail.com)