Nagbalor og P1.5 billion ang gihangyo nga pinansyal nga suporta sa Samahang Basketbol ng Pilipinas (SBP) ngadto sa gobiyerno alang sa pag-host sa Pilipinas sa 2023 FIBA Basketball World Cup.
Nihangyo niini ang SBP atol sa Senate Committee on Finance hearing nga gidumala ni Senator Bong Go diin gituki ang gisugyot nga pundo alang sa Philippine Sports Commission (PSC) ug Games and Amusements Board (GAB) sa tuig 2023.
Nagkanayon si SBP vice-president Ricky Vargas nga ang ilang gihangyo maoy 40 percent sa kinatibuk-an pundo nga P3.7 billion nga maoy gimarka sa organizing committee.
Ang pribadong sektor maoy moabaga sa 60 percent sa gikinahanglang pundo.
Matod ni Vargas nga sa pundo gikan sa gobiyerno, makabenipisyo ang ekonomiya sa nasod gumikan kay gamiton kini alang sa akomodasyon, transportasyon, seguridad ug allowances sa volunteers.
“We are seeking the help of the government in a way where we think that there will be values for what money they will give us in terms of values that would redound to the economy as well,” batbat ni Vargas nga napatik sa Spin.ph.
Kon maaparubahan isip tipik sa General Appropriations Act, ang gobiyerno mohatag sa pundo ngadto sa PSC, nga mao na’y motunol niini ngadto sa SBP.
Ang SBP maoy basketball governing body sa nasod.
Si PSC chairman Noli Eala nisaad nga mohatag og kinatibuk-ang suporta ngadto sa SBP.
“It’s our mandate to support amateur sports and since this is technically an NSA that is seeking assistance, kami po ang may mandate na tulungan ang NSA,” pamahayag ni Eala.