Gustong mas palambuon ug padatuon ni Cebu Governor Gwendolyn Garcia ang Probinsya sa Sugbo ning iyang ikaduhang termino sa Kapitolyo.
Atol sa adlaw’ng natawhan ni Garcia sa Oktubre 12, 2022, gipili niya ang pagtaho sa mga kalampusan nga nahimo sa iyang administrasyon sukad nga siya nibalik pagka gobernador sa Sugbo niadtong 2019.
“Much has been done, true but much more needs to be done. And this on the 12th of October is my message to all of the Cebuanos, buckle up, we’re moving on, we’re moving forward, we’re soaring to great heights because the best is yet to come,”matod ni Garcia sa iyang pagpamulong.
Sa gihimong taho ni Garcia, iyang gipanghisgutan ang mga proyekto ug programa nga nahimo samtang nag-atubang sa pandemiya ang nasud.
Pinaagi sa usa ka audio visual presentation, lakip sa iyang gihisgutan ang coronavirus disease (covid-19) management, pagpadayon og tukod ug pag-ayo sa mga imprastraktura ug mga agianan lakip na ang basic services, pagpatuman sa mga programa ug proyekto sa edukasyon, Enhanced Countryside Development, trabaho ug panginabuhian pinaagi sa Sugbo Kahanas ug Sugbo Negosyo.
Ang Probinsya sa Sugbo mipalambo usab sa Enhanced Countryside Development (ECD) program sa Probinsya nga nag-facilitate og loans sa mga mag-uuma ug mananagat ngadto sa mga government bank.
Moabot na sa 536 ka mga mag-uuma ug mananagat ang naka avail niini. Mokantidad na og P54.4 milyones ang napa-loan atol sa paglusad sa maong programa ug laing 1, 282 ka mga loan application ang naaprobahan na sab.
Sukad sa pagsulbong sa pandemiya, nahimugso ang nagkadaiyang mga programa diin nalakip niini ang Sugbo Kahanas nga usa ka skills training program inubanan sa Technical Education and Skills Development Authority (TESDA).
Sukad sa pagsugod, moabot sa 4, 329 na kabuok ang trainees ug 91% niini ang naka-graduate na.
Aron matabangan nga makabangon ang mga Sugboanon gumikan sa epekto sa krisis, namugna usab ang Sugbo Negosyo program nga usa ka microenterprise assistance initiative.
Sukad sa pagsugod, moabot na sa 8, 250 ang mga nakabenepisyo niini sa unang tuig ug laing liboan na usab ang makapahimulos sa ika duhang hugna sa programa.
P10B NAGASTO
Sukad niadtong 2019, ang Kapitolyo nakagasto na og P10. 83 bilyones alang sa basic services sama sa pagpaayo, pagtukod ug pagkonkreto sa kadalanan, taytayan, level 3 bulk water system, pagmuntar og mga solar streetlight ug uban pa.
Moabot na sa 450 ka kilometro sa provincial roads ang nahuman og konkreto diin P7.4 bilyones ang gigahin niini ug P2.3 bilyones na usab ang nagasto alang sa pagpaayo ug pagkonrekto sa 175 ka barangay roads sa nagkadaiyang lungsod ug siyudad sa Probinsya sa Sugbo.
Gawas niini, gilakip usab sa nakab-ot nga kalampusan sa Kapitolyo ang padayon nga pag upgrade sa mga tambalanan ug uban pang health facilities nga gidumala sa lalawigan.
Gipahibawo sa Kapitolyo nga gikan sa 2019, nisaka na P8 bilyones karong tuiga ang pundo sa Probinsya alang sa health services gikan sa unang pundo nga P1.5 bilyones.
Matag tuig aduna usa’y Caravan of Services sa matag distrito nga pangulohan ni Garcia nga moduaw aron paghatag sa kits ug serbisyo.
Sa maong kalihokan, 2, 261 na ka assistive devices ang naapud-apod sa Probinsya gikan sa mga wheelchair, sungkod ug uban pa.
Aron pagdasig ug paghatag og katakus sa mga barangay frontliner, giumentohan usab ang mga insentibo nga nadawat niini gikan sa Kapitolyo ug gipaubos sa insurance sa Government Services Insurance System (GSIS).
Alang sa serbisyo sa edukasyon, gipahibawo usab ni Garcia nga moabot sa 800, 000 usab ka school supplies ang gianam-anam sa paghatag subay sa pagbalik na sa face to face classes. Ang programa gigahinan og P163.97 million alang sa maong katuyoan.
DUGANG SERBISYO
Sa padayon nga pagduma ni Garcia, tinguha niini nga mapun-an pa ang mga serbisyo alang sa mga Sugboanon. Una nang gipahibawo niini nga subay sa pagbawi sa mga yuta nga gipanag-iya sa Probinsya, mahimo kini nga tulay aron mas modako pa ang kita sa Probinsya ug magsiguro nga ang kaadunahan sa Lalawigan matagamtaman sa matag Sugboanon.
“We will thrive because we are Cebuanos. In spite of all that has been thrown at us, we are Cebuanos — dugo ni Lapulapu. Maayo na lang nasagolan og dugong Katsila,” matod ni Garcia.
Atol sa maong kalihukan, nitambong usab ang mga mayor sa tri-cities nga mao sila si Cebu City Mayor Michael Rama, Mandaue City Mayor Jonas Cortes ug Lapu-Lapu City Mayor Junard Chan nga pulos ningpadangat sa ilang pagpasalamat ngadto sa gobernador.
Nalakip sa mga namulong mao sila si Kongresista Pablo John Garcia sa tersero distrito, League of the Municipalities of the Philippines (LMP-Cebu) ug Daanbantayan Mayor Sun Shimura, Talisay City Mayor Gerald “Samsam” Gullas ug ang kamanghurang anak sa gobernador nga si Carissa Garcia.