Ubay-ubay ang mga golden rule nga gibalikbalik og silsil sa akong alimpatakan sa akong ginikanan sa nagdako mi og sa akong mga igsuon hangtod nga nakaya na namong makabarog sa kaugalingon.

Akong ipaambit ang uban dala ang panghinaot nga makatabang kini sa ubang ginikanan sama nako sa pagmatuto sa ilang mga anak.

Labing una ang paglitok sa pulong nga ‘I love you’. Kaniadto, medyo hilasan mi molitok o makadungog ini kay sa among huna-huna para ra kini sa mga nagkahigugmaay (uyab, asawa o bana). Para nako, way limitasyon ang pagsulti ining pinaka tam-is nga pulong labi na og tinud-unay kini nga gibati.

Ipakita, ipadayag ug ipaabot sa hingtungdan aron mahibaw-an sa tanan nimong minahal nga gihigugma nimo sila. Importanti kini nga pulong ug pagbati labi na kon ilang mahibaw-an nila nga naay tiunay ug way sukod nga nagmahal nila.

Sunod ayaw undang pagpangita og paagi nga makab-ot nimo imong mga mithi ug damgo. Di malikayan ang kapalpakan panagsa kay ‘no one is perfect’ baya maong kon madagma, balik ug barog, pamaspas unya padayon sa paglakaw.

Kita tanan, ma bata o edaran, dunay mga ambisyon ug mithi nga gustong maabot busa ayaw og undang sa pagpakigbisog para imong makab-ot ang imong mga tinguha. Ibalik ang spark o drive bahala’g unsa pa ka taas o dugay ang proseso basta wa lang kay gitamakan o gipasakitan.

Ikatulo ayaw undang og explore sa kalibutan. Pagplano ug pagtigom, kuyog imong mga minahal, para maka-suroy o bakasyon sa mga lugar nga gusto ninyong maabot ug makita.

Ika-upat ang pagdayeg sa kaugalingon labi na sa mga maayong binuhatan nga nahimo. Pasalamat sa labing makagagahom sa iyang hinatag nga gasa ug grasya. Panagsa premyuhi sab imong kaugalingon ‘for the job well done’ keber og way nakakita kundi ikaw, di ba? Panagsa alsaha sab ang imong bangko.

Sa katapusan, ipadayon ang mga maanindot ug maayong binuhatan kay di matukib ang kalipay nga imong bation kon makatabang ka o makapakatawa ka sa uban.