‘Rugby girl’, 14, ‘nanulis’

Nagumon sa bisyo sa paghingos sa rugby ang 14 anyos nga dalagita nga giingong nitulis ug nidunggab sa 65 anyos nga biyuda niadtong Huwebes sa alas 12:40 sa udto, Oktubre 13, sa Purok 7, Brgy. Poblacion Ward 4, Minglanilla.

Mao kini ang gibutyag sa kapulisan sa Minglanilla base sa ilang imbestigasyon ug background sa suspek nga si Nely (di tinuod nga ngan).

Si Loreta Estal nakaangkon og pito ka mga samad dinunggaban sa kalawasan human dunggaba og kutsilyo ni Nely dihang nagkomprontase sila sulod sa balay sa biktima.

Ang dalagita taga Brgy. Inayagan, City of Naga, na-rescue sa kapulisan alas 4:00 sa hapon sa samang adlaw sa balay sa iyang uyab sa Brgy. Tinaan, dakbayan sa Naga.

Si Police Staff Sgt. Mark Rosaroso sa Minglanilla Police Station nga nahinabi sa Superbalita Cebu nagkanayon nga nakasulod sa balay ni Estal si Nely, kinsa classmate sa apo sa biktima.

Gikomprontase kini sa biktima ug nagkatinubagay sila hangtod nga nakakuha og kutsilyo ang dalagita ug gidunggab ang biktima sa makadaghan.

Giilog sa suspek ang bag nga dunay sulod nga P35,000. Moabot na lang og P10,000 ang nabawi sa kapulisan.

Bisan samdan si Estal, siya nakadagan sa gawas sa balay ug nakapangayo og tabang. Luwas na sa kakuyaw si Estal sulod sa tambalanan. Samtang si Nely gidala sa buhatan sa Dept. of Social Welfare and Development (DSWD) alang sa kustodiya.

Ubos sa balaud, ang suspek way tulubagong kriminal kay ubos pa siya sa 15 anyos.

Sa balaud, ang 15 anyos ug ubos sa 18 anyos mahimong makapanubag sa salaud kon madeterminar nga dunay kahiamgo sa krimen.