Provincial, district hospitals i-evaluate sa Kapitolyo

Ipaubos sa tulo ka buwan nga pagsusi ug evaluation ang tanang district ug provincial hospitals sa lalawigan sa Sugbo subay sa tinguha ni Gobernador Gwendolyn Garcia nga mas mapalambo ang mga serbisyo niini sa mga Sugboanon.

Gipangulohan ni Garcia ang tigum kauban ang mga pangu sa mga hospital sa upat ka mga provincial ug 12 ka district hospitals sa lalawigan sa Sugbo niadtong Biyernes, Oktubre 14, 2022.

Tuyo sa evaluation mao ang pagsusi sa kasamtangang kahimtang sa mga hospital ug ang pagtuki kon unsay mga paagi aron nga mapalambo ang mga serbisyo niini, matod sa taho sa Sugbo News, news portal sa Provincial Government.

Gusto ni Garcia nga magpabiling limpyo, hapsay ug natarong ang pagserbisyo niini sa mga pasyente.

“Are you ready for the challenge?,”matod ni Garcia ngadto sa mga hospital official nga gikutlo sa samang taho.

Sugdan ang three-month evaluation sa Nobiyembre 2022 hangtod sa Enero 2023.

Si Garcia unang niumol og grupo nga maoy mosusi sa mga hospital lakip na ang gihatag nga mga serbisyo.

Ang grupo gipangulohan ni Dr. Mary Jean Loreche nga maoy consultant on health matters sa Kapitolyo, inubanan usab ni Bokal Stanley Caminero, usa ka doktor.

Subay sa pagsusi sa grupo, gikinahanglan pa nga mapalambo ang mga ekipo, imprastraktura ug nagkadaiyang serbisyo.

Samtang sa umaabot evaluation, gradohan kini.

Ang hospital nga makakuha sa taas nga rating maoy hatagan og award sa Kapitolyo.

Gipasabot ni Garcia nga dugay na nga hagit sa Probinsya ang pagpalambo sa mga hospital sukad nga milingkod siya sa 2004 sa iyang unang termino. Apan sa iyang nakita hinay ang paglambo niini.

“I’ve been doing this 2004 pa ta nagsugod ani. Siyam ka tuig ni nakong sige panlimbasog. After nine years, what little have been accomplished, balik na sad and got worst....We’re singing the same old songs,” matod ni Garcia.

Ang Kagamhanan sa Probinsya sa Sugbo nigahin og P8 bilyones nga pundo sa 2022 alang sa pagpalambo sa mga hospital sa probinsya, healthcare workers ug ingon man ang mga serbisyo niini.

Gipilo kino og kawalo kon itandi sa P1.5 bilyones nga budget sa 2021.

Kasamtangan nga nag ung-ong na usab ang applications sa duha ka mga provincial hospital sa dakbayan sa Danao ug Bogo ngadto sa buhatan sa Department of Health (DOH) alang sa pag upgrade niini.

Nilagda usab og kasabutan ang Kapitolyo tali sa Philippine Institute for Traditional and Alternative Health Care (PITAHC) alang sa pagpailaila sa traditional ug herbal medicines sa mga hospital nga gidumala sa Probinsya.