Giklaro ni Lapu-Lapu City Vice Mayor Celedonio “Celsi” Sitoy nga wala pa aprubahi sa Sangguniang Panlungsod ang gisugyot nga pagtukod sa ikaupat nga taytayan nga magdugtong sa dakbayan ug sa Mandaue City.
Si Sitoy mihimo sa pagklaro sa Sabado, Oktubre 15, 2022, upat ka adlaw human ang Mandaue City Government nipahigayon og consultative meeting uban sa Department of Public Works and Highways (DPWH) mahitungod sa gisugyot nga proyekto niadtong Oktubre 11.
“We didn’t approve the project because we did not agree on the alignment of the approach,” matod ni Sitoy sa SunStar Cebu, samtang ang DPWH nisugyot nga tukoron ang tiilan sa taytayan duol sa ikaduhang taytayan, nailhan usab nga Marcelo Fernan Bridge, nga nahimutang sa Barangay Pusok.
Imbes nga sulbaron ang problema sa trapiko, si Sitoy niingon nga ang maong sugyot makamugna og kahuot sa trapiko sanglit ilang gisugyot nga tukoron sa tiilan sa taytayan atubangan sa Marina Mall.
Sa dakbayan sa Mandaue, ang tiilan sa taytayan tukoron duol sa Cansaga Bay Bridge.
Giklaro hinuon ni Sitoy nga wa silay supak sa pagtukod sa ikaupat nga taytayan (Cebu-Mactan Bridge), nipasabot nga nihimo sila og counter-proposal o sugyot sa DPWH nga tukoron ang tiilan sa tulay atubangan sa Mactan Economic Zone (MEZ) sa Barangay Ibo.
Sa pagsuwat ning balita, ang bise mayor niingon nga nagpaabot pa sila sa bisan unsang feedback sa nahisgutan nga ahensya kalabot sa ilang sugyot.
Si Sitoy nibutyag nga ang sugyot sa DPWH nagsugod niadtong unang termino ni Lapu-Lapu City Mayor Junard “Ahong” Chan.
Ang Regional Development Council (RDC) niadtong Hunyo 2021, niingon nga ang opsyon nga gisugyot sa Lapu-Lapu City Government makapadako sa gasto sa proyekto ug nagkinahanglan og bag-ong pagtugot gikan sa Investment Coordination Committee (ICC) ug sa National Economic and Development Authority (Neda) Board.
Ang proyekto, gibana-bana nga nagkantidad og P76.412 bilyon, gipundohan sa 119.225 bilyon nga yen nga utang (gibana-bana nga P52 bilyon). Kini adunay duha ka bahin: usa ka upat nga lane nga 3.3 ka kilometro nga taytayan, nga adunay upat ka lane nga viaduct nga elevated; ug usa ka dalan nga dunay upat ka lane nga dunay gitas-ong 4.9-km agi sa baybayon nga adunay elevated nga viaduct.