Ang basketball Hall of Famer Dikembe Motumbo ug ang three-time National Basketball Association (NBA) Slam Dunk Contest champion Nate Robinson nakigbatok karon sa sakit.
Si Motumbo, kinsa misikat isip defensive stopper sa iyang 18 ka tuig sa NBA, mipaubos og treatment alang sa brain tumor.
Naila si Mutombo sa dekada 90 tungod sa iyang “finger wag” nga iyang buhaton kon mapalakan ang kontra. Miduwa siya ubos sa Denver Nuggets, Atlanta Hawks, Philadelphia 76ers, New Jersey Nets, New York Knicks ug Houston Rockets.
Sa iyang playing career, si Mutombo nahimong 8-time All-Star, 6-time All Defensive Team selection, 4-Time NBA Defensive Player of the Year, ug siya pud ang second highest sa NBA history sa career blocks nga adunay 3,289 nga palak.
Nasulod ang 56-anyos nga bigman sa Naismith Memorial Basketball Hall of Fame sa 2015.
Ang laing kanhi NBA player nga mipahibalo sa iyang sakit mao ang 38-anyos nga si Robinson.
Sa statement ni Robinson, iyang gipadayag nga nag-treatment siya alang sa renal kidney failure. Dugang pa niini nga nagpakahilom ra siya sulod sa upat ka tuig.
Matod ni Robinson, iyang gipahibawo sa publiko ang iyang pakigbatok sa sakit aron mahimo siyang tingog sa mga tawo nga mauwaw mopahibawo sa ilang sitwasyon.
“I was never a vocal leader on the court, I preferred to lead by example, but now it’s time for me to speak up and help all those affcted by or deling with Kidney Disease," saysay niini.
Si Robinson nasulod sa NBA sa tuig 2005 isip 21st overall pick sa Phoenix Suns apan gi-trade dayon kini ngadto sa New York Knicks diin miduwa siya sa team sa 2005 ngadto sa 2010.
Bisan pa man sa iyang height nga 5-foot-9, grabe nga molupad si Robinson, mao nga midaog kini sa Slam Dunk contest sa makatulo ka higayon, sa tuig 2006, 2009 ug 2010.
Human sa iyang karera sa Knicks, nagpabalhin-balhin na og team si Robinson, miduwa kini sa Boston Celtics, Oklahoma City Thunder, Golden State Warriors, Chicago Bulls, Denver Nuggets, Los Angeles Clippers ug New Orleans Pelicans.
Ang pinakanindot nga tuig ni Robinson mao ang 2008-2009 season diin nag-average siya og 17.2 puntos, 3.9 rebounds ug 4.1 assists sa 74 games.