Malampuson nga naibot ang gibanabana kapin sa 19,000 nga punoan sa marijuana sa Sitio Song-on, Barangay Lusaran, bukirang dapit sa dakbayan sa Sugbo niadtong Sabado, Oktubre 15, 2022, sa alas 12:00 sa udto.
Ang mga sakop sa City Mobile Force Company (CMFC) sa Cebu City Police Office (CCPO) uban sa Criminal Investigation and Detection Group 7, Naval Forces Central ug 300th Air Intelligence Wing sa Philippine Air Force, misaka sa bukid aron ilusad ang anti-illegal drug operation batok sa mga nananom og marijuana.
Matod ni Police Lieutenant Colonel Dexter Calacar, commander sa CMFC, nakadawat sila og tip sa usa ka concerned citizen sa maong lugar labot sa marijuana plantation nga maoy hinungdan nga ilang gipaubos sa case build up ug nasuta nga tinuod ang maong taho.
Gilusad dayon ang operation nga miresulta sa malampuson nga pag-ibot sa gibanabana kapin 19,000 ka punoan sa marijuana nga mobalor sa P7.8 million.
Human sa malampuson nga pag-ibot sa mga tanom nga marijuana, nikuha silag sample ug gi-turnover sa Philippine Drug Enforcement Agency (PDEA) 7 ug dayon gipangsunog usab dayon kini.
Samtang, ilang gisubay kinsa ang nananom niini sa dapit pinaagi sa abag sa mga residente apan atol ning pagsuwat, wala pay nasikop nga responsable sa pagpananom niini.