Sukad sa paglusad sa Task Force Gubat sa Baha sa Cebu City Government niadtong Agusto 2022, dul-an sa 4,000 na ka mga estraktura ang nasulod sa tulo ka metros nga easement sa mga dagkong agianan sa tubig sa dakbayan.
Si Gerardo Carillo, chairman sa Cebu City Disaster Risk Reduction and Management Council, nitug-an sa SunStar Cebu nga kining mga estraktura nahimutang sa ubos nga bahin sa pito ka dagkong suba.
Si Carillo niingon nga mosaka ang gidaghanon sa umaabot nga mga adlaw sa higayon nga maabot na sa task force ang upstream nga bahin sa mga agianan sa tubig.
Ang gidaghanon sa mga estraktura nga gi-tag, tanan gi-categorize isip residential buildings ug wala maglakip sa mga komersyal nga establisemento, dugang niya.
Sa Barangay Inayawan lang, si Carillo niingon nga pito ka mga titulo nga propiyedad ang ilang natumbok nga nisulod sa tulo ka metros nga easement sa Bulacao River.
Siya niingon nga ang mga tag-iya nakigtambayayong sa City Government nga i-reclaim ang mga river easement ug magtukod og flood control projects.
Iyang gipasalig nga ang Department of Public Works and Highways maoy moproseso sa bayad sa mga pribadong ubos nga tag-iya.