NAKAMATIKOD ang Davao City Covid-19 Task Force og "jumpoff" nga pagsaka sa mga kaso sa Covid-19 sa dakbayan.
Gisulti ni Covid-19 Task Force Spokesperson Dr. Michelle Schlosser sa paghinabi kaniya sa radyo niadtong Biyernes, Oktubre 14, 2022, nga ang siyudad nakatala og 117 ka bag-ong mga kaso sa maong adlaw kon diin moabot kini og 22 porsiyento nga daily positivity rate.
"Taas kini compared katong the usual daily positivity rate na 10 to 12 percent. Nag-jumpoff ta," tug-an ni Schlosser sa paghinabi uban sa 87.5 FM Davao City Disaster Radio.
Kini gumikan sa padayong paglugak sa siyudad sa pipila sa ilang Covid-19 restrictions dala sa halapad na nga ihap sa mga nabakunahan nga mga tawo.
Matud ni Schlosser nga kasagaran sa mga kaso naklasipikar isip mild ug asymptomatic. Bisan tuod kon niingon siya nga pipila ka mga kaso naa sa critical ug severe condition.
Gisulti sab niya nga ang death rate nagpabilin sa "two digit." Apan ang opisyal wala makadetalye sa ensaktong ihap.
Ang tigpamaba nagsulti nga kasagaran sa mga namatay mao kadtong wala pay bakuna o kadtong wala magpabakuna sa booster shots.
"This is a strong reminder that we need to get vaccinated," pasidaan ni Schlosser.
Samtang gibutyag niya nga siyudad padayon nga nagpalig-on sa ilang pagpamakuna.
Bag-ohay lang ang siyudad sa Davao naglusad sa weekend vaccination sa People's Park, sa pakig-abag uban sa Philippine Red Cross.
Dugang pa sa opisyal nga abli kini hangtud sa Disyembre karong tuiga.
"Padayon nato nang weekend vaccination so that wala na gyud rason ang mga tao na dili sila kapabakuna because naa silay trabaho," tug-an niya.