“Nung ding tau ku, a mayayaus king lagyu ku, ipagkumbaba da ing sarili da,
At mangadi at pagdulapan ing lupa ku at gulutan da ing marok dang dapat,
Kanita makirandam ku ibat banwa, at patawaran ku ing sala da
at ulwan ku ing karelang balayan.”
~ Kadwang Aklat ning Pamagtala ¦Dangka 7: Sunis 14
(2 Chronicles 7:14)
“Ing pekadakilang dili kekayu yang magi yung ipus.
Uling detang tatas da ing sarili da mipakumbaba la,
at ding pakumbaban da ing sarili da mitas la.”
~ Mateu ¦Dangka 23: Sunis 10:12
(Matthew 23:10:12)
“Dapot ngana kanaku,
‘Ing kalam ku makagyu na para kekayu,
uling ing upaya ku megwang pantas king keynan.’
Inya sa’t magi kung masiglang lakwas kung magpangaya karing keynan ku,
Bang-ting upayang ing upaya nang Kristo mandatila kanaku.
Inya pin sana, para kang Kristo, matula ku karing keynan ku,
karing alipusta, karing kasakitan, karing parusa, karing kasulitan.
Uling nung kapilan ku mayna, kanita ku masikan.”
~Kadwang Aklat ding Korintu ¦Dangka 12: Sunis 9-10
“Ninu man, aygale na la ding Nwan nang Lagyu ning Ginu
king mapakumbabang kabilyan ning isip,
isip na king sarili na lakwas mababa pa king are king dalan;
ninue man sukat maging mapanupaya kesa king impun,
alang nanu mang panamdam ning maling dangalan,
at sukat yang maging maka-adyang miyampang sablang pamigalang karing aliwa.
King kabilyan ning isip antini ninu man malyaring makagale king Nwan a Lagyu ning Ginu.”
~ Katlung Pangadi nang Ginung Gauranga
(Third Prayer of Lord Gauranga)
***
Inyang mura ka pa isip, musmus ka pa. Inyang mura ka pa isip, malamarine ka pa. Inyang mura ka pa isip asna ka pa kapakumbaba. Kasi balu mu mayna ka mu, ala kang sikanan. Kasi balu mu ala kang nanu man, ala kang apagmaragul. Mamatakad ka pa karing pengari mu. Dalise ka pa pusu uling e ya pa mirusingan nanu mang ketasan, kapagmaragulan o kaparatutan. Dalise ka pa pusu uling e ya pa misamutanan nanu mang pangamakalabwad—pangamakayatu.
Inyang tinwa na ka’t meragul pepagaral da na ka king pipagaralan kilwal ning pibale-bale yu. Makarayu na ka karing pengari mung mayap kapagnasan at pamalak keka. Mipalapit ka at mekakilala kang aliwang kayanakan a e mayap pangaturu. Managkas la, panasakitan da ka katawan—lumasa ka balat at kapanamdaman karela nung e mo pakyabayan, nung e mo pakibagayan o mapus karela at karing daraptan da.
Nung e mo apusan pagsisti da ka. Awsan at bansagan da kang nanu-nanung amanung masakit akmulan. Uling e ka bisang pagsisti da, nung e ka bisang manasakit, nung e ka bisang magdili-dili—mangapatuki ka at kanita nay a mirusingan ing sadyang dalise mung pusu. Mamulang na ka. Akalingwan mu na ing kapakumbaban. Magi na ka namang mapangaya, mapagmaragul at paratut.
Akalingwan mu na ing turu ding pengari mu—ima mu, tata mu at ding apu mu. At e na ka matula nung panyabyanan da ka. E mu na paulagan ing paganaka da keka. E na maulaga keka ing aral da. E na la maulaga para keka. E Na ya naman maulaga ing Apung Ginu para keka. Deng maulaga keka deng kakaluguran mu namu at nung nanu ing sabyan da keka.
Antita mu naman ing sadyang pakamal mu king Apung Ginu. Megi na kang makasarili. Nung nanu mu ing mamye tula keka ya namung paulagan mu. Buri mu papalakpakan da ka reng kakaluguran mu. Ita ing magpaligaya keka. Nung sadya kakaulan mu lang matigik deng pengari mu—ngeni darayu na ka karela. Sisikloran man e mu no sisikloran anting sadya. Turing mu karela palabyasan namu o pianyaran salapi o nanu mang kaylangan mu. Turing mu king Apung Ginu talapamye king sablang kaylangan mu, bala ipus mu Naya mu.
Pekamaulaga namu para keka ing sarili mu. Balang gagawan mu para namu king sarili mu. Balamu katungkulan namu ning Ginu ing ipagkalub na ngan keka nanu mang buryan mu, nanu mang pagnasan mu. Bala mu mibaligtad na kayu gagampanan.
Akakalingwan mu nang pasalamat kaya, anti ing pamangalingwan mung pasalamat karing pengari mu. Isip mu, ing metusikluban dudurut ya keka. Aiisip mu ika na ing Ginu at deng aliwa alipan mu na la ngan. Ika na ing pekadakila at pekamaulagang dili e mu keti king yatu nung e pati na mabilug a sikluban.
Para keka balu mu na ngan. Para keka asna ka karangal. Para keka keka ngan ing kapuryan. Basan namu para keka ing kapakumbaban. Kasna neng rusing kasi ing pusu mu.
***
Dake Talabaldugan:
1. milumud (pangdiwa) mipalumud, agawang o milyaring melumud; menabu, menakbag king danum a makalumud. English – got drowned, submerged, engulfed, immersed, sunk, asphixiated. Alimbawa king pamangamit: “E na sasaryan milumud ya keng pikawen na ing matsing kabang panagalan ne ing paung asna naman kabagal.”
2. milunasan (pangdiwa) mikalunas, mipaldan o mikapanulu, mika-panglarin, mesalese, mikapanyalese. English – got solved, cured, healed, repaired; got better or turned; improved. Alimbawa king pamangamit: “Malambat na nag sasaing ing masakit nang gulunggulungan Radu dapot ngeni pa mung pepasyasat ya katawan keng manulu kanita ya pa milunasan tagana.”
***
MIKASING-KABALDUGANG at MISALUNGAT
KABALDUGANG AMANU TAMU
makupad – bagya-bagyang lalakad o kikimut mekad pauli ning keynan, kelang-gana, sakit o katamaran.
malagad – anting makupad, makaynip alben uling kakimut susu o pau keng pamaglakad o pamangimut; mangabaldugan mu namang ating milatan o agwat ing kapalyaryan o bilang ding bage o pati na tau o aliwang mabibye.
malamya – lakad o kimut a asnang kayna o kalambut a kimut o lakad ning ninu man.
mapekat – anting pamakat a bala mipapakat keng tutuklwan o lalakaran inya mabagal miras keng pupuntalan o malambat mayari king gagawan.
makute – aliwang kasingkabaldugan a lumang amanung gagamitan king mabagal, makupad dapot malagad mung magagamit king kasalungsungan karing mipagsalitang kabalen lakwas na karing kayanakan.
mabagal – pekamaralas magagamit king amanung mangabaldugan a kasalungat ning mabilis.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.