Lolo gipaak sa bitin, napalgang patay na

Biyudo nga lolo nga gituohang gipaak og bitin napalgang patay sa Purok Mangga, Sitio Kabulihan, Barangay Malolos, lungsod sa Barili, alas 11:20 sa buntag sa Sabado, Oktubre 15, 2022.

Si Maximo Patajo Lisondra, 61, nagpuyo sa nahisgutang lugar, baho na nga napalgan sa iyang anak.

Si Police Staff Sgt. Jeffrey Alpas sa Barili Police Station nga nahinabi sa Superbalita Cebu, nagkanayon nga ilang gituohang sa Biyernes, Oktubre 14, 2022, pa namatay ang biktima.

Apan, matod ni Alpas, nga sa Sabado, Oktubre 15, 2022, na napalgan sa anak sa biktima ang nahitabo human kini nibisita sa panimalay sa iyang amahan sa bukid.

Ang biktima dunay samad pinaakan sa bitin sa tuong batiis.

Sumala sa kapulisan, si Dr. Michelle Recto Dago sa Rural Health Office (RHU) sa Barili nikompirmar nga namatay ang biktima gumikan sa la’ o venom sa bitin.

Matud ni Alpas, posibling nisukol ang bitin dihang nakit-an sa biktima nga nikaon sa iyang mga manok.

Nakita sa crime scene ang duha ka mga manok igtatari nga ang usa wala nay ulo.

Samtang ang usa ka manok makita nga sama sa nadugmok nga gidudahang gilamoy sa bitin.

“Basin pagkakita niya nagkulod ang bitin sa manok. Iyaha sigurong tigbason sa sanggot pero naunhan siyag paak sa tiil,” dugang ni Alpas.

Gumikan sa kalayo sa lugar, wala dayon mabantayi ang biktima.

Wa pa masayri kon unsa nga matang sa bitin ang nakapaak kang Lisondra.