MOKANTIDAD sa P208,000 nga mga ismagol nga sigarilyo ang nakumpiska sa Criminal Investigation and Detection Group-Davao Occidental Provincial Field Unit (CIDG-DOCPFU) kaniadtong Oktubre 12, 2022.
Kini maoy resulta sa dul-an usa ka bulan nga surveillance batok sa mga suspek nga giingong miismagol og sigarilyo diin ilang giagi sa kadagatan sakay sa usa ka sea vessel aron makaabot sa Davao Occidental.
Sa impormasyon nga gipadala sa CIDG-DOCPFU, natigayon ang buy-bust operation didto sa Sitio Talucanga, Barangay Mana, Malita, Davao Occidental diin asa nasikop si Jhon Louie (bansagon gitago), 24-anyos, minyo, negusyante ug residente sa Barangay Felis, Malita; gidakop sab ang helper niini nga si Rante, 32-anyos, nagpuyo sab sa Sitio Talucanga.
Sumala sa CIDG-DOCPFU nga gipangunahan ni Police Lieutenant Julius Espejon nga kung wala ang nagpakabana nga komunidad, lisod nila kining masumpo, hinungdan nga mas miawhag pa sila sa katawhan diha sa pagpakabana.
Kinarton nga mga smuggled cigarettes ang nakumpiska gikan sa mga dinakpan diin pasangil nila, igo lang gibilin kanila ang maong mga produkto.
"This is a case involving economic sabotage as government loses huge amount of taxes and revenues from these products," butyag sa CIDG-DOCPFU.
Napasakaan na og kaso ang mga nahisgutang suspek didto sa korte.