Daghan ang reklamo sa mga Sugboanon sa di maayo nga panerbisyo sa mga kawani mga tambalanan nga ubos sa Lalawigan sa Sugbo. Sa matag eleksyon kanunay nga mahisgutan sa katawhan nga unta may kausaban nga mahitabo sa ilang pangalagad ug kanunay nga makiangayon alang sa mga pasyente, lakip sa ilang pamilya.

Maabot ra unya ang panahon nga matarong na ang panerbisyo sa nagkadaiyang mga hospital ubos karon sa liderato ni Gobernador Gwen Garcia kay nimando siya alang sa tulo ka buwan nga “review and evaluation” niini isip parte sa tinguha sa Kapitolyo nga mapalambo pa ang serbisyo.

Tinguha sa mando ni Garcia nga masuta unsay kondisyon ning higayona ug unsay sulbad sa problema sa higayon nga adunay makit-an atol sa pakisusi. Atol sa tigom sa gobernadora sa mga nangulo sa upat ka mga provincial hospital ug 12 ka district hospitals, niawhag siya sa mga empleyado nga kanunayon ang paglimpyo sa ilang pasilidad ug tratahon ang mga pasyente nga patas.

Gani sa monitoring nga gipangulohan ni Capitol Consultant on Health Matters Mary Jean Loreche, ilang nasuta ang kakuwang sa mga medical nga ekipo ug pasilidad.

Maayo tingali nga ang mga Sugboanon motabang niining komitiba nga gipangulohan ni Loreche aron makuha nila ang kinatibuk-an nga sitwasyon,unsay mga problema sa matag tambalanan sa lalawigan.

Makiangayon nga dunggon usab sa komitiba ang tingog sa katawhan nga mahimong ipaambit gikan sa social media o sa unsa nga paagi nga moabot kanila.

Panginlabot kamong mga lumolupyo sa lalawigan sa Sugbo pinaagi sa pagpaambit ug pagpadayag sa inyong mga bati nga kasinatian dihang nalandig kamo o inyong kabanay sa mga hospital nga ubos sa Kapitolyo.

Nindot kon ang tinud-anay ninyong kasinatian ang moabot sa monitoring committee aron segurado nga ang tinud-anay nga kasulbaran maoy tubag niini. Di malikayan nga ang mga administrator ug personnel ning mga hospital motago niadtong ilang mga bati nga panerbisyo ug pangalagad kay mahadlok man ni sila nga biaybiayon ilabi na kon masakpan sila.

Maningkamot ni sila nga kutob sa ilang mahimo matago ang mga butang nga kon moabot sa buhatan ni Garcia di sila mapasaylo niini.(josephelvirtubilan@gmail.com)