Gipanglampornas sa defending champions Golden State Warriors ang ilahang bisitang Los Angeles Lakers, 123-109, kagahapon, Oktubre 19, 2022, sa pagsugod sa National Basketball Association (NBA) 2022-23 Season sa Chase Center sa San Francisco.
Sa wala pa nagsugod ang duwa, nadawat sa mga sakop sa Warriors ang ilang championship rings sa miaging season ug labing seguro, naghatag kini kanila og dugang kadasig.
“I’m thrilled with the win,” matod ni Warriors coach Steve Kerr. “Ring night is never an easy game and the first game of the season is usually filled with some nerves early on.”
Sama sa naandan, gipangulohan ni Stephen Curry ang Warriors pinaagi sa iyang 33 puntos, nidugang og 20 puntos si Andrew Wiggins, niamot og 18 puntos si Klay Thompson samtang nitampo og 12 puntos si Jordan Poole.
Ang Lakers gipangulohan ni LeBron James pinaagi sa iyang 31 puntos ug 14 rebounds, nihatag og 27 puntos si Anthony Davis samtang nitunol og 19 puntos si Russell Westbrook.
Sa laing duwa, nagpauwan og 35 puntos matag usa sila si Jayson Tatum ug Jaylen Brown aron agakon ang hosts Boston Celtics sa kadaugan batok sa Philadelphia 76ers, 126-117.
Si Malcolm Brogdon nitampo og 16 puntos samtang nihatag og 15 puntos si Grant Williams alang sa Celtics.
Ang 76ers gipangulohan ni James Harden pinaagi sa iyang 35 puntos, niamot og 26 puntos si Joel Embiid samtang nitunol og 21 puntos si Tyrese Maxey. (AP)