Bag-ong hepe sa kapulisan sa Central Visayas, Police Brigadier General Roderick Augustus Alba, nimando sa city ug provincial directors nga kinahanglang transparent ang ilang mga programa ug mga accomplishment.
Ang police stations gimanduan usab nga i-post sa ilang social media page ang tanang contact numbers nga mahimong matawgan sa publiko.
Matod ni Alba nga lakip sa ipakita sa publiko ang dagway sa hepe sa maong police station tupad sa hotline number sa police station aron pagpakita nga transparent sila sa ilang gipanghimo.
“I will order everybody. I want them to post in all platforms available yung mga hotline numbers, yung ginawa nila for the past three quarters, gusto ko malaman ng taong bayan kung anong mga accomplishments nila and the things that they need to improve,” matud ni Alba.
Dugang ni Alba nga gitahasan usab niya ang mga chief of police nga magpa-interbyu sa media kon unsa man ang mga accomplishment niini sa ilang area of responsibility.
Dili na mahimo nga motago ang mga hepe sa matag lungsod sa mga sakop sa media labi na kon dunay mga insidente sa ilang lugar gawas lang sa mga insidente nga kinahanglan og followup operation nga dili pa mahimong itug-an sa publiko sanglit makabalda kini sa ilang imbestigasyon.
Motudlo usab ang hepe sa maong police station og spokesperson nga maoy manubag sa mga sakop sa media kon wala ang hepe niini.
Si Police Colonel Rommel Ochave, hepe sa kapulisan sa lalawigan sa Sugbo, nimando na usab sa iyang mga chief of police nga kinahanglan nga abli ang ilang komunikasyon ngadto sa media.
Labi na kon dunay mga dagkong insidente ug kon magdumili ang hepe sa pagtubag sa media, mamahimong isumbong kini kaniya.
Iyang giawhag ang mga sakop sa Defense PNP Press Corps nga motug-an kaniya kon dunay iyang personnel nga mag dumili sa paghatag sa impormasyon sa mga insidente sa ilang hurisdiksyon.
“Isumbong nyo sa akin kung hindi ma contact yung number ng COP,” bahad ni Ochave.
Gitinguha ni Ochave nga masayod ang katawhan sa ilang gibuhat sa ilang tagsa-tagsa ka hurisdiksyon.